Indo lai ni lova sipai chawimawina sang ber dawttu Kirti Chakra dawng tura thlan, Captain Lalrinawma Sailo (IC-88733Y) 4 PARA (Special Forces) chu November thla khian Rashtrapati Bhavan-ah President Droupadi Murmu-i’n Kirti Chakra a hlan ang.

#ZONEWS August 17, 2025: Indo lai ni lova sipai chawimawina sang ber dawttu Kirti Chakra dawng tura thlan, Captain Lalrinawma Sailo (IC-88733Y) 4 PARA (Special Forces) chu November thla khian Rashtrapati Bhavan-ah President Droupadi Murmu-i’n Kirti Chakra a hlan ang.

Captain Lalrinawma Sailo pa, Pu Saihmingliana Sailo chuan tunhnaia sorkar laipui-in Pakistan-a mifirfiakte laka beihpui a thlak, Operation Sindoor-a a thawh that avangin an fapa, Captain Lalrinawma Sailo chu sipai chawimawina sang ber dawttu Kirti Chakra dawng turin President chuan a pawmpui a. Kumin November thla khian Rashtrapati Bhavan-ah President Droupadi Murmu in Kirti Chakra hi a hlan dawn ani a ti a. Mi tam takin thih hnua sipai chawimawina sang an dawn laia, an fapa in a damlaia a dawng tur leh hlawhtlinna a chang chho chu Pathian venhimna zar a zo vang a ni a ti a, Mizo mipuite’n an ngaihhlutsak avangin an chhungkua an lawm hle tih a sawi bawk.

Kum 26 mi, Captain Lalrinawma Sailo hi Pu Saihmingliana Sailo leh Pi Lalthianghlimi, Chanmari veng, Aizawl te fa pathum zinga naupang ber niin, kum 1999 khan a piang a. Kendriya Vidyalaya, Zemabawk, Aizawl-ah zirna bul tanin, kum 2013-ah Rastrya Indian Military College, RIMC, Dehradun-a zir turin a inziak tling a, RIMC atanga pawl 12 a zir zawhah, UPSC buatsaih NDA & NA Exam-ah tlingin, National Defence Academy, NDA ah kum 3 a zir hnuah Indian Military Academy, IMA kum 1 zir lehin, IMA atangin Indian Army officer-ah commission a ni a, tunah hian Udhampur, Jammu headquarters ah 4 PARA (Special Forces) Captain-in a awm mek a, 4 PARA-a a awm chhung chuan helai hmunah hian a awm dawn niin a pa chuan a sawi a ni.

Kirti Chakra dawng tura thlan, Capt. Lalrinawma Sailo hi Mizoram hruaitu hrang hrang te chuan an lawmpui thu leh an chhuan thu an sawi a. Larsap Gen. V.K. Singh chuan a Instagram account ah Capt. Lalrinawma Sailo chu Kirti Chakra dawngtu tur ni 4 chauh thlan chhuah zinga tel a ni chu ropui a tih thu leh Mizo zinga he chawimawina kum 1968 a lo dawng tawhtu Subedar Chalhnuna Lushai dawta dawng leh hmasa ber a nih thu a sawi a. A huaisenna leh mahni hmasial lova hna a thawh dan chu Mizoram leh India tan chhuanawm tak a ni a ti a. A hma lam hunah hlawhtlinna nei zel turin duhsakna a hlan bawk a ni.

Chief Minister Pu Lalduhoma pawhin social media kaltlangin lawmpuina thu a sawi a, India rama Peacetime Gallantry Award sang pahnihna Kirti Chakra (Wheel of Glory) dawngtu Capt Lalrinawma Sailo chu a lawmpuiin a chhuang hle tih a sawi a. He chawimawina sang tak a dawng hian Mizo thalaite theihna ropuizia a tarlang nia sawiin, theihtawp an chhuahna apiangah mi chunga leng thei an ni tih a zirtir a ti a, a kal zelna turah duhsakna a hlan a. Home Minister Pu K. Sapdanga leh Sports Minister Pu Lalnghinglova Hmar te pawhin social media hmangin Captain Lalrinawma Sailo an lawmpuina thu an sawi a, an chhuan thu leh duhsakna an hlan thu an sawi sbawk a ni.

Home department atanga thudawn danin Capt. Sailo hian Mizoram sorkarin hriattirna a lo chhuah tawh angin chawimawina a sang tak a dawn avang hian cheng nuai 10 lawmpuina pek a ni dawn a ni.