MZP Sub-Hqrs, Sesawng chuan zirlai hlawhtlinna changte lawmpuina hun an hmang.

#ZONEWS Aizawl August 18, 2025: August ni 16, 2025 khan Mizo Zirlai Pawl, Sub-Headquarters, Sesawng chuan Zirlai tithate lawmpuina leh chawimawina hun, Sesawng Community Hall-ah a buatsaih a. Pu Lalbiakzama, Speaker, Mizoram Legislative Assembly chuan khuallian niin hun a hmanpui.

Khuallian chuan zirlai tithate a lawmpui thu sawiin, an zirlaite eizawnna tlaka thiam tur leh chhawrtlak ni turin a fuih a, ruihhlo laka inthiarfihlim tur leh chhuangkua leh khawtlang tibuaitu ni lova khawtlang tana mi chhenfakawm nih tum theuh turin a chah a, an kal leh zelna tur atan duhsakna a hlan nghal bawk a ni.

Sesawng atang hian HSLC exam beitu 37 awmin hmeichhia 19 leh mipa 18 an awm a. HSSLC exam 39 awmin hmeichhia 21 leh mipa 18 an awm a, Bachelor of Arts mi 10-in examin, mipa 6 leh hmeichhia 4 an ni a, Master of Arts exam hmachhawn hi mi 3 awmin, hmeichhia 1 leh mipa 2 an ni a. Exam hmachhawntu zawng zawngte hian hlawhtlinna changin an pass vek a ni.

Zirlai tithate puala hun buatsaihah hian Pu Lalthianghlima, President, MZP General Headquarters te, Pu T.S. Thanga, Headmaster, TM High School leh Pu H.D. Lalremsiama, Principal, Sesawng Senior Secondary School ten thu sawina hun an neih bakah tun hnaia MPSC buatsaih Mizoram Civil Services Combined Competitive Examination 2024-a Sesawng khua atanga MCS tling thar, Lawrence Lalhlanthara puala hun buatsaih niin, zirlaite nen inkawmhona hun an hmang nghal bawk a ni.