DP&AR MINISTER-IN COMBINED CIVIL SERVICE OFFICERS, 2025 BATCH-TE FOUNDATION TRAINING A HAWNG

#ZONEWS Aizawl August 19, 2025: Department of Personnel & Administrative Reforms (DP&AR) Minister Pu K. Sapdanga chuan vawiin khan Administrative Training Institute (ATI) Hall No. III-ah 2025 Batch Combined Civil Service Officer mi 34-te tana Residential Foundation Training buatsaih hawnna hun chu khuallian niin a hawng a. Pu K. Lalthawmmawia, DP&AR Commissioner & Secy chu he hunah hian khualzahawm a ni bawk a ni.

Khuallian Pu K. Sapdanga chuan officer trainee-te’n trainer tha tak tak hnuaia training an nei thei tur chu a lawmpui thu sawiin, an thil zir hmang tangkai tur leh zawhna zawt tam turin a chah a. Minister chuan ram banpui, sawrkar za pui, sawrkar chelh dingtu tur an nih thu a sawi a. Hotute hmaah pawh thu dik tan ngam tur leh ram siamthatna kawngro sutu tur an ni tih hre reng turin a fuih a. Ram tana officer tangkai an nih ngei theih nan Foundational Training chu a hawng a ni.

Khualzahawm Pu K. Lalthawmmawia pawhin thu sawiin, officer trainee-te chu mahni tan ni lova, ram leh hnam leh sawrkar tana hnaa lut an nih thu leh mahni duhzawng leh hlawkna tur chiah um lova, sawrkar hnathawk awm dan tura beisei hriaa, chutianga awm tur chuan a fuih a ni.

Foundation Training hawnna hunah hian ATI Director Pi Rita Lalnunmawii Pachuau chuan sawm bikte leh officer trainee-te lawmna thu sawiin, Pu Lalhmansanga, Joint Director (Admn.), ATI Course Director ni bawk chuan training kalpui dan tur tlangpui a tarlang a. Pi Lalrimawii Hmar, Joint Director (Trg.), ATI-in lawmthu sawiin hun a khar a ni.