MIZORAMA BHARAT FORGE CSR HMANGA HMALAK DAN TUR RELIN THUTKHAWM A NI

#ZONEWS Aizawl August 19, 2025: Vawiin khan Planning & Programme Implementation Committee room-ah Dr. Vanlalthlana, Higher & Technical Minister kaihhruaiin Bharat Forge Limited CSR hmanga Mizorama hmalak dan tur sawiho a ni a. Pu Lalnghinglova Hmar, LESDE Minister, Pu TBC Lalvenchhunga, Chairman, CSR Cell leh Dr. Leena Deshpande, Head of CSR, Bharat Forge Limited te, CII Mizoram aiawh leh official pawimawhte an tel.

Dr. Leena Deshpande hian an company chanchin tlangpui leh CSR hmanga an hmalak tawh dan te, tun hnaia Nagaland state-a an hnathawh te a tarlang hmasa a. Skill development lam an ngaihpawimawh avangin Mizoramah pawh chumi lam hawi hmalakna chu kalpui theih ni se thaa an ngaih thu a sawi. India rama a hmasa ber leh a awmchhun ni tura AI IOT Robitics Skill School Lab. Mizoram din an duh thu a tarlang.

Mizoram CSR Cell ten kumin kumtir lama CII nena tangkawpa Capacity Building Programmes an buatsaih khan Bharat Forge Limited CSR thuneitute hi an rawn tel ve a. Mizoramah an CSR hmanga hmalak an remti ta a. Hmalakna hi pahnih khat mai ni lo, a dang pawh neih chhoh zel an inhuam thu thlengin an sawi a ni.