MIZORAM MP PU K. VANLALVENA’N UNION MINISTER OF AVIATION HNENAH THLAWHNA TICKET MAN SANG LUTUK TIH ZIAAWM NAN ‘REGIONAL CONNECTIVITY SCHEME’ MIZORAM TANA HMANG VE TURIN DILNA A THLEN

#ZONEWS New Delhi August 19, 2025:
Vawiin khan Rajya Sabha MP, Pu K. Vanlalvena chuan Parliament Session adjourned lai hunawl hmang ṭangkaiin Union Minister pahnihte hnenah thil pawimawh tak a thlen.

MP Pu K. Vena chuan Union Minister of Aviation Pu Ram Mohan Naidu hnenah India ram khawpui hrang hrang aṭanga Lengpui Airport-a zinte thlawhna chuan man sang fal bik lutuk tih ziaawm a nih theihna atan “Regional Connectivity Scheme” Mizoram tana hmang ve tura dilna a thlen a ni.

Mizoram MP chuan Union Minister of Aviation hnenah, Delhi to Aizawl thlawhna chuan man hi a chang chuan Delhi to Jakarta, Indonesia khawpui kal man aia a san ṭhin thu te, a hlat lam inang reng si, Delhi to Imphal thlawh man te, Delhi to Guwahati thlawh man te aia Delhi to Aizawl thlawh man a sang fal bik em em te, Christmas dawn hnaiha India ram khawpui dang aṭanga Aizawl panna thlawhna chuan man sang fal vak zel te tihtawp a ṭul thu a thlen bawk.

Rajya Sabha MP chuan Union Minister of Parliamentary Affairs Pu Kiren Rijiju hmu bawkin, South India lama Mizo ṭhenkhatte harsatna chungchang a thlen sak bawk a ni.