CHIEF MINISTER-IN MIZORAM POLICE SERVICE ASSOCIATION CONFERENCE A HMANPUI

#ZONEWS Aizawl August 22, 2025: Vawiin khan Mizoram Police Service Association (MPSA) chuan G.S. Arya Mess, PHQ ah an Conference vawi 15-na an hmang a. Chief Minister Pu Lalduhoma chuan khuallian niin a hmanpui. Pu K. Sapdanga, Home Minister chu khualzahawm a ni.

Thu sawiin Chief Minister chuan, MPSA te chu ruihhlo donaah te, state ralmuang bera chhal theiha Mizoram a awm theihna tura an hnathawh tinrengah lawmthu a hrilh. Ruihhlo hi Sex dawta HIV thehdarhna hmanraw langsar ber a ni a. Ruihhlo do beihpui kan thlak hian HIV darh zel tur kan veng nghal a, taksa leh thlarau chhandamna hna kan thawk a ni, a ti. Tun hnaia Assam state nena ramria thil thleng chu a hriat veleh Assam Chief Minister nena an inbiak nghal thu a sawi a. Tuman harsatna siam zawnga engmah tih rih lo (status quo) tura kan lo sawidun tawh chu tha taka ken kawh kan remti dun a ni, a ti. Chief Minister thusawi langsar dangte chu:

1. Kan sorkar phat atangin eiruk dona lam kan rawn bei nghal chat a. Lok Ayukta kan thuam tha a, Inquiry Wing hawn belhin MPS Officer deputation post 3 (pathum) – Chief Inquiry Officer, Inquiry Officer leh Dy. Superintendent of Police te kan siam a. MPS Officer pathum zet in awm belh chuan, hma kan sawn ngei turah kan ngai.

2. Mizoram Police constable recruitment neih tawh zawng zawnga belhchian dawl ber leh fair ber tia sawi ngam – Constable Recruitment tun hnaiah kan nei a, police 259 lak thar an ni. Sorkar hnathawk lak kawngah hian dan ang taka kalpui leh a tling ngei te chauh lak hi kan thupui a ni. Mipui sorkar kan nih angin tumah thlei bik neih kan phal lo. Constable kan lakna kawnga thawktu in ni a, in chungah lawmthu ka sawi.

3. Kan police zingah service laia thi kan ngah thin hi ka vei a. An thih chhan tam ber lah hi nun inthlahdahna kaihhawih natna a ni deuh zel a. MPS officer zingah chuan in awm lo turah ka ngai a, in naute enkawl kawngah fimkhur rawh u. Tin, Officer ten in service leh in hamthatna ringawt in ngaihtuah a, in hnuaia thawkte hamthatna in ngaihthah leh si hian dik kan ti lo. Kan staff ten beisei (claim) an rawn neihin a lo dang bettu ni lovin a lo tanpuitu kan ni thin tur a ni.

4. Police officer chuan kan ram dante, dan thar leh amendment awm tharte kan hre bel tur a ni. Dan hi kan hmanraw tangkai, kan silai aia kan hman rim zawk a ni. Misualten min fin khalh tur a ni lo. Dan hriat kawngah chauh ni lovin, suahsuahna thar lo chhuak zelah pawh misualten min hmakhalh tur a ni lo.

5. Ram nuam tehna bulhrum chu a chhunga cheng mipuite zalenna leh ralmuannaah a ni a. Tin, ram hmasawnna hnathawh tinreng hi remna leh muanna boruak hnuaiah chauh tihpuitlin theih a ni. India rama state ralmuang bera kan inchhal ngamna chhan hi in thawh that thin vang a ni a. He hnathawh tha hi chhawm nung zel turin inbuatsaih ila, remna leh muanna palai ni zui zel ang u,

tih thu leh fuihna thu dangte a sawi a ni. MPS Bio-Data 2025 lehkhabu a tlangzarh bawk.

Khualzahawm Pu K. Sapdanga pawhin thu a sawi a. Mizoram police ten Law & Order an kengkawh tha a, kan lawm hle. Tun hnaia constable lakna, langtlang, fair leh thianghlim tak khan kalphung thara kal sorkar kan neih takzia a tilang a ni, a ti. Kan khawlaite a lo him loh tak em avangin September thlatir atang hian kawtthler leh khawtlang ralmuang zawk nei turin beihpui kan thlak dawn a. Ramri kana chet velna zirchianna pawh kan nei dawn, a ti. Mizoram police-in hma a sawn zel theih nana ruahmanna leh rawtnate a tarlang bawk.

Pu Zosangliana, President, MPSA chuan palaite lawmna thu a sawi a, sorkarin nikumah Police Quarters sakna tur Rs. 50 crore min pe a, MPS min laksak a, kuminah pawh MPS hi 8 lak mek a ni. Kan TA/DA leh kan hamthatna dang tam tak min pe chhuak a, Rifle Allowance min tihpunsak a. Constable 259 min lak tharsak a, tunah Sub Inspector 25 leh fourth grade 6 lak min phalsak leh a, sorkar chungah hian kan lawm em em a ni, a ti. MPSA member hi 139 an awm mek.

Pu Lalmalsawma Hnamte, General Secretary chuan report a pe a, Pu Seju P Kuruvilla, IPS, IGP (Crime) pawhin thu a sawi a. Pu C. Lalruaia, Sr. Vice President, MPSA chuan lawmthu sawiin inkhawm a khar a. Chawhnu lamah rorelna leh member thar lawm luhnate an nei leh a ni.