LAWNGTLAI BAWRHSAP-IN ‘BAWRHSAP AWARD’ CHUNGCHANGAH PRESS MEET NEI

#ZONEWs Lawngtlai October 7, 2025: Vawiin khan ‘Bawrhsap Award’ chungchangah Pu Donny Lalruatsanga, Lawngtlai Bawrhsap chuan Press Meet- a Office Chamber-ah a nei a. Pu H. Zonunmawia, PD (DRDO) chuan Bawrhsap hi a tawiawm a ni.

Pu Donny Lalruatsanga chuan kalkhawmte hnena lawmthu sawina a nei hmasa a. Bawrhsap Award- sawifiahna neiin, Lawngtlai khawpui tan faina leh thianghlimna bakah khawpui felfai zawk din tura inelna thianghlim a thlen ngei a beisei thu a tarlang a. Motor parking chungchangah LADC- in Parking Area – a siam bakah motor dah thin chu bansan a hun tawh hle tiin, motor neitute fimkhur turin a chah a. Ran khuahkhirh kawngah pawh tan lak thar a tul hle a, hemi kawngah hian ran vulhtuten uluk zawka an ranvulh enkawl turin a chah a ni. Pu Donny Lalruatsanga chuan Lawngtlai khawpuin kawng hrang hranga hmasawnna a neih theih nan VC, NGO leh mipuite theihtawp chhuahpui turin a sawm nghal bawk.

Bawrhsap Award- hi Lawngtlai khawpui chhunga Village Council – 12 inelna tur a ni a, Award- hi kum tinin Republic Day ( 26th January) ah hlan thin a ni ang. He Award dawng tur thlannaa tehfung hrang hrang leh lawmman tur chu a hnuaiah hian tarlan a ni.

Tehfung

1. Veng chhung faina ( Side – drain, Kawngpui, Mimal leh Vangtlang hmunhma te)

2. Ran khuahkhirh that dan

3. Veng chhung Motor – parking felfai dan

Lawmman

Pakhat na : Rs. 1,00,000 + Trophy 

Pahnih na : Rs. 70,000 + Trophy 

Pathum na : 50,000 + Trophy 

Consolation Prize : VC (Pakhat tan ) Rs. 20,000

Bawrhsap Award- dawngtu tur endik hna thawk tur hian Mizoram Journalist Association (MJA) Lawngtlai ruat an ni a, an ni hian thlatin endik hna an thawk dawn a ni.