SAITUALAH LOK SABHA MP HOIN SAWRKAR LAIPUI SCHEME KALPUI DAN THLIR LETNA- DISHA MEETING NEIH A NI

#ZONEWS Saitual October 15, 2025: Vawiin khan Saitual District Development Co-ordination and Monitoring Committee (DISHA) chu an Chairman, Pu Richard Vanlalhmangaiha, Member of Parliament (Lok Sabha) kaihhruainain DC Conference Hall, Saitualah an thukhawm a, Rural Development Minister, Tawi East Block bialtu MLA ni bawk, Prof. Lalnilawma’n a telpui bawk a ni. He hunah hian Sawrkar laipui (Centrally Sponsored Scheme) kalpuitu Department 12 te chuan an hmalakna te an tarlang a, hmachhawp an neih te an sawiho nghal a ni.

Vawiin thutkhawmah hian Lok Sabha MP Pu Richard Vanlalhmangaiha chuan thu a sawi a, Sawrkar laipui chuan India ram hmasawn nan scheme hrang hrang duangin theih tawpin tan a la a, a hlawhtlinna tur atan DISHA kaltlangin hmalakna te chu vilzui reng thin a ni, a ti. Sawrkar laipui scheme (Centrally Sponspored Scheme) te chu mipuite chawikan nan leh ram hmasawn nan a pawimawh hle a ni tih sawiin, heng scheme kalpuitu department hotute chu theih tawp chhuah theuh turin a sawm nghal a ni.

Minister Prof. Lalnilawma pawhin thu sawiin, Saitual District-a department hrang hranga hotuten thawhhona tha tak an nei thin chu lawmawm a tih thu a sawi a, DISHA meeting chu department tin te hmalakna inhriat tawnna a ni, a ti a, he meeting hian rah tha a chhuah a beisei thu sawiin, kalkhawmte chu theih tawp chhuah chhunzawm zel turin a ngen a ni.

Vawiin thutkhawmah hian Rural development, PHE, Education & Samagra, Agiculture, Horticulture, Social Welfare, Chief Medical Officer, Lead District Manager, UD&PA, Commerce & Industries, PWD, Supplies, CDPO ten an office kaltlanga scheme leh programme an kalpuite chipchiar takin an sawifiah a. Hmalakna an kalpui dan te, hmachhawp an neih te leh scheme hrang hranga hlawhtlinna an lo neih tawh te an tarlang a ni.

DISHA hi sawrkar laipui hmalakna viltu Committee a nih piah lamah Department hrang hrangte inkarah thawhhona tha siam a, an Scheme a hlawhtlin theihna tura thawhho dan kawng zawng tura din a ni. Vawiin thutkhawm hi Lok Sabha MP Pu Richard Vanlalhmangaiha chuan a kai hruai a, RD Minister Prof. Lalnilawma, Saitual Bawrhsap Dr. Lalngura Tlau, DISHA member te, department hotute leh khawtlang hruaitute an tel a ni.