SOCIAL WELFARE MINISTER-IN SSWRC-TE SKOCH AWARD DAWN LEH KUM 35 TLIN LAWMNA HUN A HMANPUI

#ZONEWS Aizawl, October 8, 2025: Pi Lalrinpuii, Minister, Social Welfare Department & Women and Child Development (SW&WCD) Department chuan vawiin khan Protective Home ni thin, State Social Welfare and Rehabilitation Centre (SSWRC) ni tain SKOCH Award a lak leh kum 35 a tlin lawmna hun chu khuallian niin a hmanpui.

Khuallian Pi Lalrinpuii chuan SSWRC chu an award dawn avang leh kum 35 chhunga ram tana hna tha taka an thawh theih avanga a lawmpui thu sawiin, ruihhlo avanga kan ramin harsatna a tawhte siamtha turin sawrkarin hma a la a, mipuite harsatna sukiang turin theihtawp chhuah zel a tum a ni, a ti a. Chu’ng zingah chuan SSWRC rawngbawlna pawh telin, tha taka thuam zel a nih tur thu a sawi a. Social Welfare Minister chuan he Award hi tuna thawk mekte leh he centre leh department tana thahnemngai taka lo bei thintute avanga dawng thei an nih thu a sawi a ni.

Mizoram Social Welfare Department hotute chuan thawktu inlungrualna leh kalphung fel tak an neih avang te, pawnlam mi leh pawl hrang hrangte nena thawhhona tha an neih avang tea dawng thei an ni tih an sawi bawk.

He hun hi Pi Lalzarmawii, Commissioner & Secretary, SW&WCD-in kaihruaiin, Sobriety Programme leh Rising Day Programme-a then a ni a. SWD hotu te, NGO te leh SSWRC-a awm te an tel a ni.

SSWRC hi kum 1990 atanga kalpui niin Chanmari West (Maumual)-ah a awm a. Hmeichhia, ruihhlo avanga harsatna tuarte enkawlna hmun niin, mi 50 an awm thei a, thla 7 chhungin rehabilitation bakah skill training – puantah, puanthui, beautician, computer course-te zirtir an ni thin a ni.

Mizoram Social Welfare Department hnuaia State Social Welfare and Rehabilitation Centre (SSWRC) (tunhmaa Protective Home tih thin) chuan September ni 20, 2025-a Skoch Summit 101, Silver Oak Hall, India Habitat Centre, Lodhi Road, New Delhi-a neihah India rama sawrkar department leh private company-te chawimawina sang tak, independent organization, SKOCH, New Delhi-in a pek thin, SKOCH Award for Silver Category in Social Welfare dawngin, award hi Mizoram Social Welfare Department hotute’n an zuk dawng a ni.

SKOCH Award hi India rama Sawrkar Department hmalakna nei thate chawimawina niin, SSWRC hian India ram puma diltu sang chuang zingah Silver Award a dawng a ni. SKOCH Award hi private establishment pek ni mah se NITI Aayog hriatpui a ni.

Award an dawn theih chhan chu he centre hi state sawrkar enkawl centre-te zinga inrelbawlna tha nei, hna thawh thatna hmun a ni a. SSWRC-ah hian enkawl lai mi 50 leh thawktu 24 an awm mek a ni. Tin, India ramah hetiang centre state sawrkarin a enkawl awm chhun a ni.