AIZAWL DISTRICT DAPCC (DISTRICT AIDS PREVENTION AND CONTROL COMMITTEE) THU KHAWM

#ZONEWS AIZAWL October 8, 2025: Vawiin khan District AIDS Prevention and Control Committee(DAPCC), Aizawl district chuan DC conference Hall-ah, District bawrhsap  leh DAPCC chairman ni bawk Er.Lalhriatpuia IAS  kaihruaina hnuaia meeting an nei.

Vawiin meeting-ah hian April-August,2025 chhunga DAPCC hmalakna hrang hranga thlirletna hun hman a ni a. Aizawl district chhunga HIV+ hri kai thar an pung zel mai hi engtia hmalak tur nge tit e khunkhanh taka sawiho a ni a. Intensified IEC (Information, Education & Communication) hnuaia  thla 5 kal ta chhunga hmalakna hrang hrang report thlirho a, chipchiar tak leh huangzau taka sawi ho a ni hnuah,DAPCC member kalkhawm te atangin rawtna hrang hrang leh hmalak zel dan tur  te ngaihthlak a ni bawk.

Dr.R.Zonunmawii, DPM, DISHA chuan Power Point Presentation hmangin thla 5 kalta (April-August,2025) chhunga Aizawl district  AIDS/HIV+ dinhmun a entir a.

Report a tarlan dan in thla 5 kalta chhung khan Aizawl district chhungah  thisen( general) 15032  test atangin HIV+ hri pai mi 448 hmuhchhuah a ni a. Nu naupai thisen 3584 test atangin HIV+  hri pai mi 19 hmuchhuah an awm. HIV+ kai te hi kum 25-35 inkar mi an tam ber a,Kum 14 hnuailam pawh mi 7 lai an awm a ni.

HIV+ an kaina chu: Heterosexual  atangin 76.3%, Homosexual/Bisexual atangin 6.4%, Hriau inhmantawm atangin 14.7%, Nu leh Pa atangin 1.5% leh kaina hriat loh( not specified) 0.8% te an ni.