Chief Minister Pu Lalduhoma’n Champhai DC Office hmalakna hrang hrang hawnnaah tel

#ZONEWS Champhai October 15, 2025: Nimin khan Champhai Circuit House-ah Chief Minister Pu Lalduhoma’n Champhai DC Office hmasawnna atana hmalakna hrang hrang hawnna hunah khuallian niin a hmanpui a, Champhai South bialtu Lt. Col. Clement Lalhmingthanga chu khual zahawm niin a tel bawk a ni.

Khuallian Pu Lalduhoma chuan hetiang hmalakna ropui tak a awm thei hi ropui a tih thu sawiin Champhai Bawrhsap thawh thatna te a fakawm tih a sawi. EAST Champs hnuaia zirtirtute leh officer te inpekna ropui a tih thu a sawi a, All India Services officer te zirlaite tana an thahnem ngaihna avangin lawmthu a hrilh bawk. Zirlai te leh hna zawng mek te tan lak a tul tawh tih a sawi a, hna hrang hrang laknaah te tling turin theihtawp chhuah turin fuih an ngai tih a sawi bawk. Sawrkarin sipaiah te, police-ah te leh hna hrang hrangah Mizo an awm chho a, an awm belh zel dan te pawh an ngaihtuah mek bawk tih a sawi. Project LANU hnuaia hmeichhe naupang hnena sanitary pad hman nawn theih leh cycle pek an tum pawh tha a tih thu sawiin English foundation zirtirna an tih tum pawh Hindi tum tel theih chuan a hlawkthlak zual a rin thu te a sawi. Ngur VO eizawnnaa puih an tum leh Hnahsin Kut fai tak hman an tum te pawh a fak a, Bana Kaih nen inkungkaihna tha tak pawh heng hmalaknaah hian a awm theih a rin thu a sawi. He’ng hmalakna hrang hrang hian Champhai District tana danglamna tha a siam ngei theih nan duhsakna a hlan a, hmalakna hnuaia bungrua hrang hrang – ginger slicing machine te, cycle te leh thil dang a sem nghal a ni.

Khual zahawm Lt. Col. Clement Lalhmingthanga chuan heng hmalakna ropui tak a bialna district-a a thleng thei hi ropui a tih thu a sawi a, Bawrhsap leh a hma latute chungah lawmthu a sawi. Heng hmalakna te hian zirlai tam tak tan hmasawnna a thlen ngei a rin thu a sawi a, zirna leh eizawnnaah hmasawnna a siam ngei a rin thu a sawi bawk. Hlawhtling taka kalpui a nih ngei theih duhsakna a hlan a, Foundational English Learning certificate leh litter free Hnahsin Kut atana bungrua a sem nghal a ni.

He hun hi Champhai DIPRO Pu Lalzara’n a kaihruai a, Champhai Bawrhsap Pu Mohammad Aaquib chuan hmalakna hrang hrang chungchang PowerPoint presentation hmangin a sawifiah. SDO (Sadar) Pu Chandrakant Bagoria chuan lawmthu sawiin hun a khar a ni.

Champhai DC Office hmalakna te chu hetiang hi a ni:

1. EAST Champs (Enabling Aspiring Students of Champhai) – Civil service tlin tumte tana tanpuina leh kaihhruaina

2. Project LANU (Lifting Adolescents Needs and Utilities) – Hmeichhe zirlaite hnenah cycle leh sanitary pad hman nawn theih pek a ni ang

3. Foundational English Learning – Zirlai naupangte sap tawng zirtirna

4. Livelihood Programme for Ngur VO – Sawhthing zaina leh tihrona pek an ni ang

5. Career Guidance with AIS Officer – IAS leh IPS officer te’n zirlai naupang an kawm a, zirlai leh hna chungchangah kaihhruaina an pe

6. Litter free Hnahsin Kut – Fai tak leh thianghlim taka Hnahsin Kut hman