CHAMPHAI LEILET A SANGHA MAN RUNPUI HAWNNA NEIH A NI

#ZONEWS Champhai October 15, 2025 : Vawiin khan PMMSY (Pradhan Mantri Matsya Sampada Yojana) Scheme hnuaia Champhai leilet a Sangha khawitute leh Fisheries Department, Champhai District te buatsaih “Champhai Leilet Sangha man runpui” Champhai Zotlang, Phaipheia neihah Pi Laltleipuii, Director, Fisheries Department chu Khuallian niin he hun hi a hmanpui a ni.

Khuallian Pi Laltleipuii chuan, Champhai leilet neitu te chu Buh leh sa tharchhuah nana Leilet hmang tangkai tu hmasa, midangte tih hmuhtu an ni chu lawmawm a tih thu leh PMMSY Scheme hlawhtlinpui tu an ni chu lawmawm a tih thu a sawi. Champhai District tan PMMSY Scheme hmangin tanpuina chi hrang hrang kum 2020 atanga 2025 chhung hian mi 475 hnehah tuikhuah thar laihna (New Pond) an pek tawh thu leh hemi atan hian a pawisa faiin cheng Vaibelchhe sawmhnih pathum nuai sawmnga pahnih singriat (Rs. 23,52,80,000/-) leh Sangha note dahna tur Rearing Pond kum 2020-2025 chhung hian mi 294 hnenah pe tawhin a pawisa fai chuan cheng Nuai za sawmkua pahnih singthum sangruk (Rs. 1,92,36,000) a nih thu a sawi. Tin, “Paddy cum Fish Culture” bikah kum 2020 atang khan vawiin thleng hian mi 482 hnenah pek a nih tawh thu leh a pawisa fai chuan cheng Nuai sawmriat pakua singli (Rs. 89,40,000/-) an pek tawh thu a sawi bakah Champhai District tan hian kum 2023-2024 ah Additional project atan New Pond, Rearing Pond, Paddy cum leh Hatchery te duhsak takin pek an nih tawh thu a sawi bawk.

Champhai Leilet Sangha man runpui hawnna hun kaihruaitu Pi Lalremsangpuii, District Fisheries Dev. Officer, Champhai District chuan Leilet buh kar a Sangha khawi “Paddy cum Fish Culture” ah hian kuminah mi 240 hnenah tanpuina an sem thu leh a pawisa fai chuan cheng Nuai sawmnga pakhat (Rs. 51,00,000/-) lai a nih thu a sawi bakah Sangha chi common carp hlang an sem thu a sawi.

He hunah hian PMMSY DLC member te, DAO Champhai, DCO Champhai, Champhai Fish Farmer Association, Champhai Phaizau Water user Society te leh VCP New Champhai leh Zotlang ten an telpui bakah thu tawi an sawi bawk a ni.

Champhai Leilet Sangha man runpuiah hian Leilet Sangha chu Champhai a Sangha man pangngai aia 30% a tlawmin 1Kg, cheng 600 a hralh thin kha cheng 400  in an hralh a, kg 134 hralh chhuakin a vaiin ₹53,600 an lalut a ni.