Transport Minister Pu Vanlalhlana’n Saitual District Transport Office (DTO) a hawng

#ZONEWS Saitual October 15, 2025 : Vawiin khan Keifang Venghlun, Saitual District-ah Transport Minister Pu Vanlalhlana’n Saitual District Transport Office (DTO) a hawng a, Lok Sabha MP Pu Richard Vanlalhmangaiha leh RD Minister Prof. Lalnilawma ten an tawiawm bawk a ni.

He hunah hian Minister Pu Vanlalhlana chuan Saitual District Transport Office din theih nana tha leh zung sengtu zawng zawngte chungah lawmthu a sawi a, Saitual District-in DTO an nei ta chu thinlung taka a lawmpui thu a sawi. Khuallian chuan transport department chu sawrkar department sum thawk chhuak tlem te zinga mi a ni tih a sawi a, sawrkar tha taka a kal theih nana thawh hlawk bertu zinga mi an ni tih a sawi bawk.

Minister chuan DTO tangkaina te a tarlang a, mipui him tlan nan dan tlawh chhanin hna an thawk dawn tih a sawi a, mipuite pawh tha taka a thawktute tawiawm turin a ngen a ni. Pu Vanlalhlana chuan tui hmanga inkalpawhna (inland water transport) Mizorama a awm ve theih nan hma an la mek tih a sawi a, hei hian mipuite tan awlsamna a thlen dawn a ni, a ti. Minister chuan DTO chu Saitual district-a lirthei khalhtu zawng zawng te tan hmasawnna a nih ngei a beisei thu a sawi a, tangkai taka mitinin an hman theih nan duhsakna a hlan a ni.

Khual zahawm Prof. Lalnilawma pawhin thu sawiin, Saitual District-ah hmuh theihin hmasawnna a awm chho zel a ni, a ti a, Adriving license leh motor registration dil tura Aizawla kal kher ngai tawh loin, mahni district ngeia dil theih a ni tawh tur chu lawmawm a tih thu a sawi a, mipuite tan awlsamna nasa takin a thlen dawn a ni, a ti. Prof. Lalnilawma chuan DTO office te chu mipuiten an tangkaipui a beisei thu a sawi a, a duhsakna a hlan nghal bawk a ni.

Vawiin inkhawm hi Pu Zosangliana, Secretary, Transport Department-in a kai hruai a, Transport Minister Pu Vanlalhlana, Lok Sabha MP Pu Richard Vanlalhmangaiha, RD Minister Prof. Lalnilawma leh District Bawrhsap Dr. Lalngura Tlau ten thu an sawi a, Er. R. Lalrammawia, Director, Transport Department chuan report a pe bawk. Pi Margaret Lalrinawmi Fanai, Jt. Director (OP), Transport Department chuan lawmthu sawiin hun a khar a ni.

Vawiin vek khan Transport Minister Pu Vanlalhlana chuan Saitual District Hospital-a OPD Building sak mek, Saitual DC Complex-a DC Bangla sak mek leh Saihmar tlanga Circuit House sak mek te chu a tlawh bawk a ni.