ICT MINISTER LEH STPI DIRECTOR GENERAL TEN MIZORAMA SOFTWARE TECHNOLOGY PARK DIN CHUNGCHANG SAWIDUN

#ZONEWS Aizawl October 15, 2025 : Vawiin khan Information & Communication Technology Minister Dr. Vanlalthlana leh Software Technology Parks of India (STPI) Director General Pu Arvind Kumar te chu Minister pisa-ah inkawmin, changtlung leh chak zawka Mizorama STPI din a nih theih dan tur chungchang an sawidun a; Director General hi Ministry of Electronics and Information Technology Minister Pu Ashwini Vaishnaw-a leh Mizoram ICT Minister te indawrna bawhzuia Mizorama rawn kal a ni.

He an inkawmnaah hian ICT Minister Dr. Vanlalthlana chuan Mizoram ṭhalai zinga IT kaihhnawiha ngaihtuahna leh thiamna neite leh ei zawng duh ten bul an ṭan theih nan STPI hi Mizoramin a mamawh tak a nih thu sawiin, chak taka hma lak a nih theih nan state sawrkar chuan theihtawp a chhuah tur thu a sawi a; STPI chu Aizawl bakah Lungleia din a nih theih dan sawiin Aizawl-a MZU, NIT, NIELIT leh computer application course zirlaite behchhana din a nih theih angin, Lungleiah pawh Mizoram Engineering College, Mizoram Polytechnic Lunglei leh computer application course zirlaite behchhana din theih a nih thu a sawi.

STPI hotute chuan ruahmanna lo siam turin Minister chu an chah a, rang taka hma lak an inhuam thu an sawi a ni.

STPI Director General hi Guwahati Jurisdictional Director Pi Vandana Srivastava-in a ṭawiawm a ni.