8th Rashtriya Poshan Maah Celebration cum Thanks Giving Day Siaha-ah hman a ni

#ZONEWS Siaha October 16, 2025 : District Programme Office, Siaha leh PM POSHAN, Siaha tangkawp chuan vawiin khan MADC Golden Jubilee Hall-ah 8th Rashtriya Poshan Maah celebration cum Thanks Giving day an hmang.

He hun hi Pu Lalduhsanga, District Coordinator, PM POSHAN chuan a kaihruai a, Siaha District a PM POSHAN MAAH kalpui a nih dan leh an hmalakna hrang hrang a tarlang nghal. Vawiin programme-ah hian Poshan Maah hlawhtlinna tura tha lẹh thilpek hmanga thawh hlawk zualte hnenah lawmthu sawina citation hlanna neih niin chungte chu : 

1) Siahatla 1 VC ( School desk, Kitchen repair, compost pit) 

2) Chheihlu VC (waiting shed, water reservoir, kitchen shed roof, bawlhhlawh halna, compost pit)

3) Vaihpi VC ( Sintex, cooler, dustbin etc)

4) NGO ( MCHP, MSO, MHIP, LWA leh Self Help Group) 

District Education Officer/ District Project Coordinator, Samagra Siaha District leh District Programme Manager, Poshan Maah ni bawk Pi NG Fanchun chuan kalkhawmte chu lawmthu a hrilh a, Mid Day Meal sem kawngah Mizoram pumah Siaha District chu Kohhran leh Khawtlang te contribution that berna an ni thei chu a ropui a, fak an phu a, an pual liau liau a vawiin hun chu buatsaih a nih thu a sawi.

Mid Day Meal tia hriat thin chu Kum 2021 atang khan Poshan Maah tia thlak a ni tawh a, Sawrkar Laipui in scheme a kalpui tam tak zinga a ngaih pawimawh ber pakhat a ni, a ti. School naupangte chhun chaw pekah Poshan Maah chu a tawp mai lo a, zirlai naupangte chu pum ruak leh riltamin Lehkha an zir tur a ni lo tih thutiam a keng tel a ti bawk a ni. Siaha District school 199 ah Mid day meal pek mek a ni a, zirlai naupang mi 13045 in MDM pualin chaw chhun a dawn ziah thu a tarlang bawk a ni.

Pu K Beingiachhie, Sr EO (MS) MADC pawhin thu sawiin Mid Day Meal puala contribution nei tha ber district kan ni thei chu lawmawm a tih thu a sawi a, Sawrkar school te pawh nasa takin hma an sawn tawh a, chhun chaw sem thin chuan naupang harsa zual, Sawrkar schoola kal te phurna thar a pe a, school kal nuam an tih phah hle a ti bawk. Khawtlang in rohlu a neih chu zirna in a ni a, thlahthlam a thiang lo a, dawmkan fo an ngai zawk a ni, tiin ram leh hnam hmangaihna thinlung  nen tang lehzual turin a sawm nghal bawk.

Heng bakah hian MCHP Gen Hqrts President Pi P Chaki, MSO Gen Hqrts President Pu Elson Eliasah Notlia leh Joint VC aiawhten thusawina an nei nghal bawk a ni. Pu Zokhai Khuhly, Master Trainer PM Poshan chuan 8th Rashtriya Poshan Maah chungchang sawifiahna a nei a, Pu JC Lalthansanga, BRCC chuan vote of thanks sawina neiin hun tih tawp a ni.