Member of Parliament (Lok Sabha) Pu Richard Vanlalhmangaiha kaihhruaiin Khawzawl DISHA thukhawm

#ZONEWS Khawzawl October 16, 2025 : Vawiin khan Khawzawl District Development Co-ordination and Monitoring Committee (DISHA) chu Chairman, Pu Richard Vanlalhmangaiha, Member of Parliament (Lok Sabha) kaihhruainain DC Conference Hall, Khawzawlah an thukhawm.

Lok Sabha MP Pu Richard Vanlalhmangaiha chuan DISHA member te leh sawm bik te an hun hlu tak senga an lo tel avangin lawmthu a sawi a, an hmalakna te a ngaithlain puih theih zel dan tur a ngaihtuah ang tih a sawi bawk. India ram hmasawn nan district hrang hrangah MP hovin scheme hrang hrang DISHA kaltlangin hmalakna te endikna neih thin a ni a, Sawrkar laipui scheme (Centrally Sponspored Scheme) te chu mipuite chawikan nan leh ram hmasawn nan a pawimawh hle a ni tih sawiin, heng scheme kalpuitu department hotute chu theih tawp chhuah theuh turin a sawm nghal a ni.

Vawiin thutkhawmah hian SDO (Sadar) Pu Suvigya S. Chandra chuan PowerPoint presentation hmangin Rural Development, PWD, Agiculture & Farmers’ Welfare, Horticulture, LAD, UD&PA, Irrigation & Water Resources, Animal Husbandry & Dairying, Women & Child Development, Health & Family Welfare, PHED, Education, FCS&CA, Fisheries, Lead Bank, BBNL, P&E leh KVK hnuaia scheme leh programme kalpui mek te a sawifiah a, department hotute’n zawhna te chhangin sawi belh an nei pah bawk. Hmalakna an kalpui dan te, hmachhawp an neih te leh scheme hrang hranga hlawhtlinna an lo neih tawh te an tarlang a ni.

Khawzawl DISHA thutkhawmah hian Khawzawl Bawrhsap leh DISHA Member-Secretary ni bawk Pu K. Vanlalthiana, DISHA member te, department hotute, VC member te leh khawtlang hruaitute an tel a ni.

DISHA hi sawrkar laipui hmalakna viltu Committee a nih piah lamah Department hrang hrangte inkarah thawhhona tha siam a, Scheme a hlawhtlin theihna tura thawhho dan kawng tha zawk sial tura din a ni.