Health Minister in Geneva ah Office dawr

#ZONEWS Geneva October 18, 2025 : Nimin khan Pi Lalrinpuii, Health & Family Welfare Minister chuan Geneva, Switzerland ah Doctors Without Borders ( Medecins sans Frontiers) hotu Pi Marie Elosabeth, Humanitarian Representative to the United Nations in Geneva, chu a office ah lengin Mizoram ah zau zawka thawhho dan tur a sawipui.

Doctors Without Borders hian Lawngtlai leh Champhai district a raltlante tan health sector hnuaiah project an lo kalpui tawh thin a, tunah pawh Zokhawthar ah raltlante tan hriselna kawngah nasa takin hma an la mek a ni, Minister chuan Mizoram in HIV/ Aids dona kawngah pawh thawhho puiah sawmin MSACS hmalak mekna tichak tur leh Aids vei te enkawlna kawngah leh invenna kawnga tanlak puiah a sawm a, Mizoram chu India ramah population chhut a Cancer natna vei tam ber kan nih thu sawiin zirchianna neihsak turin a sawm bawk a ni.

Doctors without Borders hotu chuan Africa ramah CAB-LA (Cabotegravir Long-Acting) program hmanga HIV darhzel tur venna kawnga hlawhtling taka hma an lo lak tawhdan sawiin Minister ngenna chu theih ang tawka an lo bawhzui tur thu a sawi a, Mizorama an project kal zel naah Sawrkar support tha tak an dawn thin avangin lawmthu a sawi bawk.

Minister hian WHO Geneva Office dawr lehin Consultant Pi Soma a kawm a, Mizoram chu India ram kilkhawr taka awm a nih thu leh a bikin thingtlanga chengte zingah nu leh naupang hriselna dinhmun ala tha tawk lo hle tih a sawi a, WHO in Mizoram a Health Department tichak tura a hmalak mekna Immunization, nu leh naute hriselna leh khawtlang mipui hriselna (Public health) ah te WHO in a puih thinna te chu lawmthu sawiin hei aia nasa lehzual zawka Mizoram a rawn thawk turin a sawm bawk.

International Red Cross Society hotute pawh dawrin Mizoram chu India hmarchhak kilkhawr taka awm a nih bakah International border a nih avangin hnam tenau (minorities) ho zingah hriselna dinhmun a la hniam hle tih sawiin thawhho puiah a sawm a, ICRC hotute chuan ngun taka an lo ngaihtuah tur thu leh Minister ngenna leh sawmna chu an ngaih pawimawh thu sawiin theihtawp an lo chhuah tur thu an sawi.