I&PR Minister B.Lalchhanzova’n Mizoram tan Green Climate Fund hmuh theih dan kawng dapin Expert te a kawm

#ZONEWS Kolkata October 18, 2025: Vawiin khan I&PR Minister Pu B.Lalchhanzova chuan Kolkata Mizoram House, Salt Lake-ah Dr. Dipak Das Gupta, Climate Scientist, Ministry of Finance Govt of India a Principal Economic Adviser hlui leh Pu Joy Chakravarty te a kawm a. He hunah hian UNDP hnuaia  Green Climate Fund  chu Mizoramin a hman tangkai ve theih tur chungchang te an sawiho a ni.

Dr. Dipak Das Gupta chuan India hmarchhakah sik leh sa inthlak chuan nghawng a neih len thu sawi a. Hemi kawnga hmala tura Mizoram sawrkarin hma ala tan chu lawmawm a tih thu sawi.  Pu B.Lalchhanzova nen an inkawmnaah hian Mizoram in  climate change mitigation lamah priority sector a siam hmanhmawh a ngai tih  a sawi a.  Thingtlang loneih hlawk tawhlo chungchang te,  sik leh sa inthlak avanga eizawnna danglam mek te, sawhthing chin eizawnna te leh Mizoram state chungchang thil hrang hrang an sawi ho bawk a ni. 

Pu B.Lalchhanzova chuan 3rd August 2025 khan Aizawl-ah sawihona nei anih thu leh August ni 1, 2025 khan Bhubaneshwar ah Green Climate Fund (GCF) Regional workshop a a tel thu sawiin, he tah hian thil pawimawh tam tak an zir thu te, GCF chungchangah India hmarchhak  te chuan tan lak kan la ngaih nasat thu a sawi bawk. 

January, 2026-ah regional workshop for North East chu Mizorama neih anih theih nan MoEFF leh UNDP lam te nen an in dawr mek zel  tih Minister chuan a sawi bawk.

 Inkawmhonaah hian Climate Finance hnuaia Mizoram tana hmalak theihna kawng te chak zawk dap chhoh dan tur zawn a tul zia sawi a ni a. Hemi ti chak tur hian Mizoram sawrkara department hrang hrang te bakah Financial Institutions te leh zirna in te, khawtlang te tanrual a tul thu Dr. Dasgupta hian a sawi bawk a ni.

Climate Finance chungchangah hian Mizoram Chief Minister in Pu B.Lalchhanzova, I&PR Minister chu hmala tura a ruat angin hma lak chhoh niin, EF&CC Minister Pu Lalthansanga  leh RD&PR Minister Prof Lalnilawma te nen Climate Finance hi an buaipui mek a ni.