AGRICULTURE MINISTER LEH REVENUE MOS HOVIN AGRISTACK ATANA AGRICULTURE LAND SURVEY CHUNGCHANGAH THUTKHAWMNA NEIH A NI

#ZONEWS Aizawl,October 21, 2025: Vawiin khan Agriculture & Farmers’ Welfare (A&FW) Minister Pu P.C. Vanlalruata leh Land Revenue & Settlement (LR&S) Minister of State Pu B. Lalchhanzova-te kaihhruaina hnuaiah Digital Agriculture Mission peng pakhat, Agristack atana Agriculture Land Survey chungchang sawihovin Aijal Club Conference Hall-ah A&FW Department, LR&S Department, Horticulture Department leh District Council & Minority Affairs Department hotute an thukhawm.

A&FW Minister Pu P.C. Vanlalruata chuan Digital Agriculture Mission chu mission namai lo a ni tiin, Agriculture Land Survey kaihhnawih department hrang hrangte an thukhawm thei chu lawmawm a tih thu a sawi a. Sawrkar hmalakna atana data neih that a pawimawhzia sawiin, data hmang chuan loneitute chu an thil mamawhte nena tuahrem an ni thei dawn a ni, a ti.

LR&S Minister of State Pu B. Lalchhanzova pawhin thu sawiin, department-te chu inmamawh tawn an ni a, mumal taka thawhho nan convergence framework changtlung neih a rawt a. Thawhhona tha rah chu ram tan leh loneitute tan hmasawnna leh thlamuanna a ni dawn tih a sawi a ni.
He thutkhawm hi district hrang hrang atangin DC te, Autonomous District Council hruaitute leh department hotute’n video conference hmangin an chhim a. Pi Ramdinliani, Special Secretary, A&FW Department leh Pu Vanlalmawia, Commissioner & Secretary, LR&S Department-te’n an department hmalakna leh hmabakte an tarlang a.

A&FW chuan Digital Crop Survey an kalpui that avangin SASCI hnuaiah cheng vaibelchhe 50 bakah North East State tithate tana cheng vaibelchhe 10 belh chu an dawng thei dawn a. LR&S pawhin Handholding Scheme hnuaia Chief Minister’s Land Reforms Programme atangin cheng vaibelchhe 5 an hmu dawn bawk a ni.

Pu Simon Rosangliana, Deputy Director, A&FW Department chuan Digital Agriculture Mission chungchangah presentation pein, Mizoram chu hmarchhak state-te zinga Digital Crop Survey kalpui thei state pahnihna a nih thu a sawi a ni.