Lungleiah Project LEAP hnuaia Lungsen leh Tlabunga health assessment camp buatsaih tur atana inbuatsaihna thlir ho a ni

#ZONEWS Lunglei, October 21, 2025 Khuangchawi: Vawiin khan Lunglei District Additional Deputy Commissioner Pi Zoramdini hovin a hna thawh pindanah vohbikte chawi kanna tur hma lakna – Project LEAP (Lunglei’s Empowerment for Access and Equity for all Persons) hnuaia October ni 23 & 24, 2025-a Lungsen leh Tlabunga vohbikte hriselna dinhmun endikna, health assessment camp buatsaih tur atana inbuatsaihna thlir ho a ni.

PwD health assessment camp hi October ni 23-ah Lungsen Primary Health Centre-ah buatsaih tum niin, October ni 24-ah Tlabung Sub-District Hospital-ah buatsaih tum a ni bawk a. Health department leh Social Welfare department aṭanga mi thiam kalte’n vohbikte hriselna dinhmun hi an endiksak dawn a. Disability Certificate/Unique Disability ID (UDID) card la nei lote tan ID a siam theih dawn bakah, vohbik 40% chung lam disability nei, UDID nei tawhte chu ALIMCO aṭangin ṭanpuina hmanraw chi hrang hrang – wheelchair, bengdar, mitdel tiang, zakdawh tiang leh hmanraw dangte dilsak an ni bawk ang.

He health assessment camp buatsaih turah hian vohbik dinhmun zir chianna (PwD Survey) aṭanga chhinchhiah sa, Lungsen block chhunga vohbik 63 leh Tlabung block chhunga vohbik 72, an zavaiin mi 135 tinzawn an ni.