Project BLOOM hnuaiah Lungsen Aspirational Block-a ASHA, AWW leh ANM (3A) te tan training buatsaih a ni

#ZONEWS Lunglei October 23,, 2025: Lunglei District Bawrhsap hma lakna, Project BLOOM (Better Living through Outreach, Optimal Maternal & Child Health) kal tlanga Lungsen Aspirational Block huam chhunga nu leh naupang hriselna atana hma laknaah hmasawnna ṭha zawk hmuh a nih theih nan, vawiin khan Lungsen Hmar Veng YMA Hall-ah thawktu lungthu pathum (3A) – ASHA, Anganwadi Worker leh ANM (health & wellness officer leh health worker) te tan capacity building programme buatsaih a ni.

Lunglei District Bawrhsap Pi Navneet Mann chuan he training hi a hmanpui a. Nu nau pai leh naupangte hriselna leh hmasawn nana thawktute’n mahni mawhphurhna ṭheuh a hrana ṭha taka an thawh chu thil ṭha tak a nih laiin, hma lakna hlawhtling zawk a awm theih nan thawktute inhriat pawh leh thawh hona ṭha neih a ṭul thu a sawi a. NITI Aayog aṭangin hriselna leh chaw ṭha chungchangah Lungsen Aspirational Block thuam ṭhatna tur sum tam tak dah a nih thu leh hma lak mek a nih thu sawiin, Project BLOOM leh programme hrang hrang hnuaiah theih tawp chhuaha hma lak a nih lai leh hmasawnna pawh hmuh zel a nih laiin, ṭan lak ngaihna lai tam tak a la awm tih a sawi a. Damdawi ina nau neih a pun theih nana Project BLOOM aṭang leh sawrkar aṭanga ruahmanna siam chu mipuite’n an chhawr ṭangkai theih nan BLOOM Gift Basket leh SafeWombWheels chungchang te mipuite hnena puangzar tam tur leh ṭhahnem ngai taka thawk turin khaw tina thawktute chu a chah a. Mamawh an neihte chu a theih anga ngaihtuah zel a nih tur thu a sawi.

Lunglei Bawrhsap Pi Navneet Mann chuan 3A-te hna thawh dan leh hmasawnna chhinchhiahna tur, “3As Report Card” siam thar chu a tlangzarh nghal a. 3A-te hna thawh dan hi tehfung 10 (health 5 & nutrition 5) hmangin November 2025 aṭanga March 2026 thlengin thla tin endik tur niin, a ti ṭhate chu DC Office aṭangin lawmman siamsak an ni dawn a. 3As Report Card thar hi Additional DC Pi Zoramdini chuan ASHA, AWW leh ANM te kutah a hlan nghal a ni.

Lungsena 3As Capacity Building Programme buatsaih hi Lungsen Block Development Officer Pu Lalhruailiana Zote chuan a kaihruai a. Lungsen Aspirational Block huam chhung khaw hrang hranga Health & Wellness Officer, Health Worker, ASHA leh Anganwadi Worker te kal khawmin, Lunglei District Deputy Chief Medical Officer Dr Christina Zonunmawii, District Programme Officer (Women & Child Development) Pu C. Lalnunfela, Lungsen Child Development Project Officer Pu Vanlalsanga leh Lungsen Primary Health Centre (PHC)-a Medical Officer Dr Lalremruati te bakah, ICDS Circle Officer-te leh H&FW District Quality Manager te’n training an pe a. Chawhnu lamah AWW-te tan YMA Hall-ah leh HWO, ANM leh ASHA te tan BDO Conference Hall-ah training buatsaih chhunzawm a ni bawk.

Project BLOOM hnuaiah hian nu nau paiin damdawi in ngeiah nau an neih theih nan inzirtirna leh hma lakna kalpui niin, nau nei turte tana a thlawna koh theih tur lirthei – SafeWombWheels ruahman a nih bakah, nau nei tur leh buaipuitute lo chawlh lailawkna khualbuk (waiting room) ruahman a ni a. Raipuar an nau pai aṭanga thla thum chhunga inziak lut (register)-te hnenah ‘BLOOM Gift Basket’ pek niin, nu leh naupangin chaw ṭha mamawh khawp an hmuh theih nan ICDS kal tlangin hma lakna hrang hrang kalpui a ni bawk.

Project BLOOM hma lakna rah chhuahah hian nau pai inziak lut leh damdawi ina nau nei pawh an pung chho zel a. Lunglei District puma nikum chhunga nau nei hriat theih chinah 84% chu damdawi ina nau nei an ni a; kumin 2025 April – September chhunga nau nei 1120-ah damdawi ina nau nei 954 (85%) an awm.