CHAMPHAI ZOTLANG MULTIPURPOSE PRIMARY AGRICULTURE CREDIT SOCIETIES OFFICE HAWNG

#ZONEWS Champhai October 24, 2025: Champhai Zotlang Multipurpose Primary Agriculture Credit Societies (CZM-PACS) Office chu Pu John LT Sanga, Registrar, Cooperative Society, Govt. of Mizoram chuan vawiin khan a hawng.

Pu John LT Sanga chuan Champhai Zotlang M-PACS te’n Office building thar an hawn tak chu an tan ni chhinchhiah tlak leh hlu tak an hmang tih sawiin, a tirah cheng sing 3 chauhin bul tan mahse a hlawkna cheng nuaih chuang an nei tawh chu lawmawm a tih thu a sawi. Sawrkar laipui chuan M-PACS ah nasa taka hma a lak mek thu tarlangin kumtin Cooperative Societies Registrar te kokhawmin Cooperation Movement nasa taka tih hmasawn a tum mek thu a sawi a, India ramah retheihna umbo tura sawrkar laipuiin hma a lak meknaah Cooperative Society hi kawng pawimawh ber a nih zia a hriat avangin thanglian zel turin sawrkar laipui chuan hma a lak nasat thu a sawi a, Cooperative Society hi a bul tannaah chuan te viau mahse inlungrualna nen an lo thanlen zelna chuan mi rethei te’n leirem an rah ve theihna tur kawng a hawnsak dawn bakah kan ram atang hian retheihna a umbo tur thu a sawi.

Pu John LT Sanga chuan United Nations chuan kumin hi International Year of Cooperatives atan a puang tih sawiin Cooperative hmanga khawvel nuam siam a, retheihna avanga rahbi tleute tundin a tum, a ti a, Ram changkangah chuan Cooperative Society pawimawhna an hmang tangkai mek a, lian tak taka awmin ram thenkhat ah chuan an sawrkar pui thei dinhmunah an din tawh thu sawiin Mizo te chu huhoa thil ti thin kan nih avangin Cooperative Society hlawhtlinpui turin theihna kan nei ngah hle, M-PACS hi hlawhtlinpui tur chuan inlungrual a pawimawh tih hre reng turin a chah a, NGO te’n khawtlang tana hna an thawh zawng zawngte hi Cooperative Society hian a tih ve vek tur a nih thu sawiin khawtlang tana innghahna tlak leh kut leh ke ni tura thawkrim a, tan la tlang tura chain duhsakna a hlan a, Champhai Zotlang M-PACS ah hian Account a hawng nghal a ni.

Champhai Zotlang M-PACS Office hawnna hi Pu B. Lalchhanhima, District Cooperative Officer, Champhai chuan kaihhruaiin Pu Lalrindika, Secretary Champhai Zotlang M-PACS chuan building sak a nih theihna tura hma an lak dan leh Society dinhmun tlangpui tarlangin hmalakna tura hmachhawp an neih te a sawifiah a ni.

Champhai Zotlang M-PACS hi a tirah chuan Zotlang East Primary Cooperative Society tiin hun rei tak an lo kal tawh a, April ni 30, 2023 ah PACS hi din tanin September ni 1, 2024 ah an kalpui tan a, Champhai Zotlang M-PACS tiin a hming an thlak a ni.

Pu John LT Sanga hian nimin tlai khan Tualte MPACS Building a hawng bawk a, MPACS chu thingtlang tan bank tangkai tak, loan awlsam zawka lakna leh khaw pawn-a sum luangchhuak tur ven nana sum dahthatna tha tak a nih thu a sawi.

Tualte khuaah hian kum 2019 atang khan Tomato chin tan a ni a, kum 2022 khan Tualte Tomato Growers Cooperative Society Ltd. din niin tomato lei leh hralh bakah PACS leh Health Care System te an khawtlang tan an kalpui thin a, kum 2025 atangin Tualte MPACS tiin an hming an thlak a, kum 2024 chhung khan Tomato cheng vaibelchhe 2.3 man hu an hralh a, October 2025 thleng khan cheng vaibelchhe 1.24 hu an hralh tawh a ni.

Tualte MPACS hian tomato sawngbawlna collection centre, Tomato Ketchup Line, Cold Storage bakah Processing House te an nei a ni.