LARSAP HOVIN JANJATIYA GAURAV VARSH 2025 LAWM DAWN

#ZONEWS Aizawl November 13, 2025: India ramin zalenna a hmuh theih nana tribal hruaitu thawh hlawk tak, Bhagwan Birsa Munda pianchamphaphak vawi 150-na pualin naktuk November 14, 2025 (Zirtawpni) hian Mizoram pumah ‘Janjatiya Gaurav Varsh’ lawm a ni dawn a. A lawmna pui ber chu Planning & Programme Implementation Department buatsaihin naktuk chawhma dar 10 atangin Raj Bhavan Circular Lawn-ah Larsap, General (Dr) Vijay Kumar Singh, PVSM, AVSM, YSM (Retd) hova neih a ni ang.

He hunah hian Bhagwan Birsa Munda leh Mizo tribal hero-te zahna lantirna hun hman a ni dawn a. Janjatiya Gaurav Varsh chanchin ngaihthlak a nih dawn bakah, Mizo hnam lam leh zai mawi tak takte entir a ni dawn a. Tribal Freedom Fighter Wall siam a ni dawn a. Craft, handloom leh food stall-te siam a nih dawn bakah Innovation Exhibition siam a ni dawn bawk a. Hengte hi mipuite tlawh theih turin  Zirtawpni leh Inrinni nilengin hawn a ni ang.