UD&PA MINISTER-IN CHITE VENG PLAYGROUND THAR A HAWNG

#ZONEWS Aizawl November 14, 2025: Vawiin khan Aizawl Smart City Ltd., Urban Development & Poverty Alleviation Department hmalaknaa din Chite Veng Playground chu UD&PA Minister Pu K. Sapdanga’n a hawng. Hawnna hun hi Chite Playground, Chite veng-ah buatsaih niin Pu Lalmalsawma Pachuau Secretary, UD&PA Department chuan inkhawm a kaihruai a, Field Management Committee leh khawtlang hruaitute he hunah hian an tel a ni.

UD&PA Minister chuan thu sawiin “sawrkar hmasaah leh tun sawrkarah Mizoramin Sports Minister tha tak kan nei hi kan vannei hle a ni” a ti a; khawtlang hruaitute leh sports department te nena thawh hona a that avanga he playground pawh din a nih thu sawiin thawh hona tha awm zel se a duh thu a sawi a. Khawpui hmasawnna chu UD&PA department-te mawhphurhna a nih anga theihtawp chhuaha hma lak zel a nih tur thu sawiin “Mizote tan sports chu eizawnna tlak a ni tih atakin kan hmuh chho zel a, Mizo Player ten National level medal an dawng thinte hi Infrastructure dintu Department tan pawh hlawhtlinna ropui tak a ni” tiin, nasa lehzuala sports infrastructure-te pawh tih hmasawn zel tum a nih thu a sawi bawk.

He Chite playground ngei pawh hi mi tam lehzual chher chhuaktu a lo nih theih nan, thalaite chu eizawnna tlak thiamna pawchhuak deuh deuh turin duhsakna a hlan bawk a ni.

Playground hawnna inkhawmah hian Pu CC. Lalchhuangkima, Chief Executive Officer, Aizawl Smart City Ltd. hnen atangin Technical Report ngaihthlak a ni a. Report-a tarlan a nih danin Project cost hi Vbc 9.85 niin he hna thawk tur hian North East Consultancy Services (NECS) te rawih an ni a, hna hi November 25, 2022 ah thawh tan niin, August 27, 2024 ah zawh a ni.

Playground zau zawng hi 102m x 60m a ni a, Buffer Area 1.5m niin Circulation Area 3.0m a ni a, phullem tha ber chi phah a niin Playground sirah Pavilion sak a ni bawk a; Vomitory – 2, Player’s Room- 2, Player’s Toilet/Washroom – 2, Lobby – 2, Media Room, Official Lounge, Control Room, Corridor 2.5m a zau leh Shed Roof-te he Pavilion-ah hian a awm bawk a ni. Hei bakah hian Gallery hnuaiah Toilet 6 leh Store Room 1 a awm bawk a; lirthei dahna hmun felfai tak siam ni bawkin, 2-wheeler – 100; 4-wheeler – 20 leh Bus – 2 te a dah theih bawk a ni.

Chite Veng Playground enkawl tur hian YMA, Local Council, MUP, MHIP aiawhte telna ‘Field Management committee’ din niin he playground atanga sum hmuhte chu vengchhungin 70% changin 30% sawrkarah an chhunglut thin a ni dawn a ni.