A TAWP A TAWPAH VIKTOR GYOKERES CHUAN ARSENAL A ZAWM TA NGE NGE E.

#ZONEWS July 26, 2025: Rei tak chhung an inchhai a. A lut dawn, a lut leh dawn lo. Tunkarah an sign dawn tihvelte a ni thin. Tunah erawh a chiang tak tak ta. Arsenal thu chhuah chuan, “Viktor Gyokeres chuan Arsenal-ah rei tak chhung cham turin contract a ziak fel ta,” tiin an chhuah a ni. He striker goal thun thei zet mai signature nei tur hian Sporting Lisbon hnenah Arsenal hian 73m euros (£63m) an pe a ni.

Arsenal tantute tan chuan lawma zuan tawr tawrna tham a ni ngei ang. Teuhsenal tia club dang tantute deusawhna titawp turin striker tha an mamawh. Premiere League-ah a zawnin vawi thum ngawt pahnihna an ni. Champion ngei an tum ruh tawh hle a. A chhanna pe theitutur chu he Swedish striker ngei hi niin an ngai a. An tum ruh bawk a, an striker sign turin Arsenal-a luh a lo chak ve bawk nen, harsatna tam tak paltlangin Arsenal player a ni fel ta e.

He kum 27 mi striker hian Sporting Lisbon tan match 102 atangin goal 97 zet a khung thei a. League nem zawk deuha ngaih ni mah sela, a theuneu thei lo hrim hrim.

Sporting Lisbon-a a cham chhung, season hnih chhung hian, Viktor hian a zawnin League title a chawipui a, National Cup chawipui bawkin, season hnih chhung hian league top scorer a ni ve ve bawk. Tin , an ram Sweden tana a inlan hnuhnung 17-ah goal 12 zet a khung bawk.

Stockholm-a piang Viktor-a hian  IF Brommapojkarna-ah inkhel bul atan a, Youth Academy-ah bul tanin, Under-17 leh Under-19 ah game 31 atangin goal 32 zet a khung a, Senior tana a khelh hmasak ber (a debut) hi kum 17 a nihin a khel tan a ni.

He striker goal khung thei zet mai hian kum 2018 khan Brighton & Hove Albion a zawm a, mahse Brighton-a a awm chhung hian Loan-in Swansea City, St. Pauli leh Coventry City tan a khel daih thung a. A tawpah a nghetin kum 2021 khan Sky Blues a zawm a, Kum 2023 khan Championship Play Off final a thlenpui a ni.

Sporting Director Andrea Berta leh Arsenal Manager Mikel Arteta te Viktor-a avang hian an hlim hle mai a. Ani pawh hian phur takin Arsenal Pre-season tour a zawm nghal dawn a ni.

Arsenal-a Number 14 ha tur Viktor Gyokeres hian Arsenal-ah danglamna a rawn thlen thei ang em? Arsenal tantute tan erawh season tan hun an nghahhlelh chhan ber pakhat a ni ngei ang le.