AGRICULTURE MINISTER PU P.C. VANLALRUATA’N NI ZUNG CHAKNA HMANGA ALU CHI DAHTHATNA (SOLAR POWERED COLD STORAGE) A HAWNG

#ZONEWS Kolasib December 4, 2025: Vawiin khan Pu P.C. Vanlalruata, Minister, Agriculture and Farmers Welfare Department chuan Thingdawl Agriculture Farm-ah Ni zung chakna hmanga Alu chi dahthatna tur ‘Solar Powered Cold Storage 100-MT for Potato seed ’ a hawng. He hunah hian Pu Lalfamkima, Deputy Speaker, Mizoram Legislative Assembly chu Khualzahawm  a ni.

Khuallian Pu P.C. Vanlalruata chuan thu sawiin, Kolasib District chhunga department hrang hrangte hmalakna hriat a nuam a, a lawmawm hle a ni, a ti. Minister chuan kuthnathawktute harsatna lian tak pakhat chu a hun taka thlai chi tha hmuh a ni thin lo hi a ni tih sawiin, “Alu chi tha pawh a hun taka kan hmuh thin loh avangin kan thar chhuah tur ang kan thar chhuak thei lova, a hun taka a chi kan hmuh theih chuan kan thar tam ngei a rinawm a ni ,” a ti.

Minister chuan kuthnathawktute harsatna a hriatthiampui thu sawiin, Minister anih angin farmer-te tan theihtawpa hma a lak  thu a tarlang a. Vawiina Cold Storage hawn tak pawh chu kuthnathawktute tana hmasawnna ruhrel pawimawh tak a nih thu sawiin, an mamawh zawng zawng phuhruk lo mah se, engemaw chenah chuan a puih theih ngei a rin thu a sawi. Agriculture leh a kaihhnawih Department te tanrual a pawimawh thu leh, hmasawn tur chuan tunlai khawvel thiamna (modern technology) chhawr tangkai a tul thu a sawi bawk a ni.

Khualzahawm Pu Lalfamkima, Deputy Speaker , Mizoram Legislative Assembly chuan Alu chi siamna Kolasib-ah hawn a ni ta chu lawmawm a tih thu a sawi a. Alu chu chhungkaw tin ei ber leh mamawh a nih thu sawiin, kum tluana phai atanga kan chawk luh hnem ber a nih avangin keimahni ngeiin kan thar chhuah a pawimawh hle a, chumi tur chuan kuthnathawktute pawhin tan an lak a ngai a ni, a ti.

He hun hi Pu R. Lalnunzira, Director, Agriculture & Farmers Welfare Department chuan a kaihruai a. Pu Lalchhanliana, EE, Agriculture & Farmers Welfare Department hnen atangin Technical Report ngaihthlak a ni.

Vawiina hawn tak ‘Construction of Solar Powered Cold Storage-100 MT for Potato Seed’ hi Technical report a tarlan a nih angin Model Organic Farm, Thingdawl, Kolasib District-a sak a ni a. NABARD RIDF-XXVII Scheme hnuai atanga sak niin, a sak nan hian Rs. Nuai 258.89 hman a ni. He sum hman zat atang hian Rs. Nuai 245.94 hi NABARD Loan niin, Rs. Nuai 12.95 hi State Matching Share (SMS) a ni. He project hi Ni 30 May, 2022 khan NABARD in a sanction a, Administrative Approval hi Ni 20 May, 2022-ah hmuh niin, Ni 12 December, 2022 leh Ni 19 February, 2024 khan 1st leh 2nd installment hmuh a ni.