AIZAWL DISTRICT HUAP THAWNTHU INSAWISIAKNA NEIH A NI; Pakhatna – Grace Lalrinpari Hauzel, Pachhunga University College

#ZONEWS Aizawl July 25, 2025 Zirtawpni: Aizawl DC Office chuan vawiin khan I&PR Auditorium-ah district huap thawnthu insawisiak, ‘District Level Storytelling Competition for Aizawl District’ a buatsaih a. He intihsiakna hi Tourism Department-in ‘Narrating Mizoram: Tales of Our Land’ tih thupui hmanga ram chhung huap thawnthu sawi intihsiakna, ‘State Level Competition on Storytelling’-a Aizawl District aiawha tel turte thlanchhuahna atana buatsaih a ni.

He hunah hian Pu Zoramsiama Hmar, Addl. DC chuan thu sawiin, Tourism Department-in khualzin hipna atan leh Mizoram chanchin hnam dangten an hriat ve theihna atana a buatsaih chu lawmawm a tih thu a sawi a. Ram chawisanna atan khawvel changkannain a ken tel, inbiakpawhna tha leh social media-te hman tangkai a pawimawh thu sawiin inelnaa telte chu duhsakna a hlan nghal a ni.

Vawiin hun hi Pi Lalhriatpuii Phutin, Aizawl SDC leh Pu Samuel Malsawmzuala, Aizawl SDC-te’n an kaihruai a. Inelnaah hian mi 16-in Aizawl-a hmun lar leh tlawh hlawh paruk: Sailam; Lungleng Lal In; Phulpui; Sakawrhmuituai Tlang; Hangi Lunglen Tlang; Sialsuk te bakah Aizawl District chhunga history nei thate chanchin an insawi ngaihnawmsiak a. Pi V. Lalmuanpuii, Mizoram Youth Commission (MYC) Secretary; Pu Lalrammawia Ngente, Associate Professor, Govt. Johnson College; Dr. Albert Vanlalruata, PS to Education Minister leh Pu Lalnunpuia Hrahsel, Author te’n an endik a. Pi Lalngaihawmi, Aizawl SDC-in lawmthu sawiin hun a khar a ni.

Mizorama hmun chanchin rualkhai zawk leh khualzinte hip thei zawnga chhawpchhuah a nih theih nana buatsaih tur, ‘State Level Competition on Storytelling’-a Aizawl District aiawha tel turin a hnuaia mite hi thlanchhuah an ni.

Pakhatna – Grace Lalrinpari Hauzel, Pachhunga University College

Pahnihna – P.C. Lalruatdika, Sialsuk

A titha zual pathumte hnenah lawmman hetiang hian sem a ni bawk:

Pakhatna – Rs. 8000

Pahnihna – Rs. 5000

Pathumna – Vasty Lalremruati, Sentea Memorial School, Zemabawk – Rs. 3000