AIZAWL THAKTHING VENGAH REDUCE, REUSE, RECYCLE (RRR) CENTRE HAWN A NI

#ZONEWS Aizawl August 14, 2025: Vawiin khan Urban Development & Poverty Alleviation Department hnuaia Swachh Bharat Mission (Urban) 2.0 hmalaknain, Permanent Reduce, Reuse and Recycle (RRR) Centre chu Govt. Multi-Utility Centre, Thakthing-ah Pu Lalmalsawma Pachuau, UD&PA Secretary-in a hawng a, hawnna inkhawm hi Pu Jacob Lalawmpuia, UD&PA Director-in kaihruaiin UD&PA Department hotute, Aizawl Smart City Ltd. leh AMC hotute bakah NGO hruaitute an tel a ni.

RRR Centre hi bawlhhlawh paih tih tlem, hman nawn theih hman nawn leh hman tangkai dan kawng zawn nana hmalakna niin, mipuite tlawhpawh theih reng tura hawn a ni a. A phal apiang ten an bungraw hrang hrang – thuamhnaw, pheikhawk, lehkhabu leh zirlaibu hlui, choka bungrua, toys leh thil dangte, an hman tangkai tawh loh, la hman tlak si te, a mamawh zawkte tana an thehkhawmna hmun tura duan niin, a duh leh mamawh apiangin, an duh ang ang a thlawnin an la ve thei dawn a; he hmalakna hian nasa takin bawlhhlawh paih mai tur a tih tlem dawn bakah mamawhtute tan hnemhnanawm tak a ni thei dawn a ni.

Reduce, Reuse, Recycle Campaign hnuaiah hian March, 2025 khan Swap & Save – Sikul Bungraw Inthleng Runpui chu Mizoram District Headquarters zawng zawngah neih a lo ni tawh bawk a, zirlaite leh zirlai nu leh pa ten an hlut hle.

RRR Centre, Thakthing-ah hian a duh apiangte tan phal thil thehkhawm reng theih a nih bakah mamawhte pawh lak theih reng a ni dawn a; UD&PA Department chuan mitinte he hmalakna hi thlawpa, mahni theihna zawn theuha tan lo la ve tur leh RRR Centre pawh lo tlawh ve ngei turin a sawm a ni.