ART & CULTURE MINISTER-IN MILLTA INKHAWMPUI A HMANPUI

#ZONEWS Aizawl December 19, 2025: Pu C. Lalsawivunga, Minister, Art & Culture Department chuan vawiin khan Govt. Aizawl College Sikulpuikawn Campus-ah Mizo Literature and Language Teachers’ Academy (MILLTA) Inkhawmpui chu khuallian niin a hmanpui a, Seminar lehkhabu a tlangzarh nghal bawk.

Khuallian Pu C. Lalsawivunga chuan MILLTA hmalakna zara University thlenga Mizo subject zir theih a ni ta leh doctorate degree hial pawh lak theih a ni te, Mizoram chhunga subject pawimawh ber zinga mi a ni thei leh Mizo thu leh hla leh tawngin hma a sawn zel theihna tura theihtawp an chhuah chu lawmawm a tih thu a sawi a. India Constitution Eighth Schedule-ah Mizo tawng a tel ve theih nan theihtawp chhuah zel a tul thu a sawi a. National Education Policy (NEP) 2020 chuan mahni pianpui tawnga lehkha zir theih chu a dah pawimawh thu sawiin, “Mizo tawng ngei pawh hi University level-ah pawh nasa taka hman tura ruahman chhoh zel a ni,”a ti.

Art & Culture Minister chuan khawvel hmun hrang hranga Zofate phuarkhawm tur leh zawmkhawm tur chuan thu leh hla a pawimawh thu a sawi a. Mizo zai leh thawnthu hrang hrangte chu zir chian tham a nih thu leh hnamdang lakah pawh chhuan tham a nih thu sawiin, “Kan hnam rohlute hi ziaka nasa lehzuala puanchhuah zel ka duh takzet a ni,” a ti bawk.

Minister Pu C. Lalsawivunga chuan, Mizo hnam tobul leh thlang tlak kawng chu chhui chian a tul thu leh a chhuichiangtu tur committee pawh Chief Minister kaihhruainaa din a nih tawh thu a sawi a. Chumi kawngah pawh chuan finchhuah zel turin MILLTA member-te a sawm a ni.

MILLTA Inkhawmpui hi Pu K. Vanlalawia, Vice President-in kaihruaiin, Prof. C. Vanlalhruaia, President-in thutawi a sawi a. Dr. H. Laldinmawia, Secretary leh Dr. Enid. H. Lalrammuani, Treasurer te atangin report ngaihthlak a ni a. MILLTA Secretary report atanga a lan danin, kum 2025 chhunga MILLTA member thar 17 awm belhte nen an vaiin member 149 an awm mek a. An pawl member zinga doctorate degree nei thar panga – Dr. Enid H. Lalrammuani, PUC; Dr. Lalrotluanga, PUC; Dr. F. Lalzuithanga, Govt. Khawzawl College; Dr. Lalzarzovi, Govt. Hnahthial College, Dr. Thang Sian Tluang, PUC te hnenah lawmpuina an hlan bawk a ni.

MILLTA Inkhawmpuiah hian chawhnu lamah an pawl President, Prof. C. Vanlalhruaia kaihhruaiin an pawl inkaihhruaina dan siam danglamin ro an rel a. ‘Kum Zabi 21-naa Mizo Fiction Zir Chianna’ Dr. Lalrammuana Sailo, PUC paper buatsaih chu an zirho nghal bawk a ni.