ASSEMBLY SPEAKER-IN MLA-TE TANA BUATSAIH ARTIFICIAL INTELLIGENCE CHUNGCHANG ZIRNA HUN A HAWNG

#ZONEWS Aizawl October 15, 2025: Mizoram Legislative Assembly Speaker Pu Lalbiakzama chuan vawiin khan Assembly Conference Hall-ah Mizoram Legislative Assembly Member-te tana buatsaih, ni hnih chhung Artificial Intelligence (AI) chungchang zirna hun, ‘Empowering Mizoram Legislative Assembly with AI: Training on Artificial Intelligence for the Members of Mizoram Legislative Assembly’ chu a hawng.

Speaker chuan thu sawiin, khawvel hmasawn zelah theihna leh thiamna sang zelin, technology hman nasat a ngai deuh deuh dawn a, ram hruaitute tana he’ng thiamna thar, AI hman dan hriat chu a pawimawh avanga he hun hi buatsaih a nih thu a sawi a. Mizo tawng ngeia AI lama mithiamte’n zirtirna an pe thei tur chu lawmawm a tih thu leh a bulthut atanga thiam a pawimawhzia sawiin, MLA-te chu he training an hlawkpui ngei theih nan duhsakna a hlan a ni.

LushAITech Chief Executive Officer Pu Lawmna Kima pawhin hetiang lama hmathlirna nei ram hruaitu kan nei chu lawmawm a tih thu a sawi a. AI chuan khawvel a la thlak danglam dawn chauh a, a lera thuai ai chuan a bulthut atanga zirchian a pawimawh a ni, a ti a. AI chakzia piah lamah mihringte tana a tha zawnga hman dan an zir tel tur thu sawiin, ram rorelnaah leh Mizoram economy siamthat kawngah a puih ngei a beisei a ni, a ti.

Hawnna hun hi Pu Lalthangmawia, Additional Secretary, Mizoram Legislative Assembly chuan a kaihruai a. He training hi Speaker leh Chief Minister Pu Lalduhoma-te hmalaknaa LushAITech nena tangkawpa buatsaih niin, vawiin leh naktuk hian thupui hrang hrang hmangin MLA-te chu LushAITech atanga resource person – Pu Lawmna Kima, CEO; Pu Lalremruat Kima, CFO; leh Pu Robert Lalramhluna, VP-te chuan an zirtir dawn a ni.