BANA KAIH SCHEME PHASE-II KALPUI DAN TUR REL A NI

#ZONEWS Aizawl August 08, 2025: Nimin khan Planning & Programme Implementation Department Committee Room-ah Mizoram Sawrkar Flagship scheme ‘Bana Kaih Scheme Phase II’ kalpui dan tur relin Mizoram State Policy Coordination Committee chuan thutkhawmna an nei a. Pu KC Lalmalsawmzauva, Adviser to Chief Minister (Handholding) leh Vice Chairman, MSPCC chuan hun kaihruaiin Pu Lalmalsawma Pachuau, Secretary, Planning & Programme Implementation Department chuan thurel tur hrang hrangte sawi zauna hun a hmang a. MSPCC member-te bakah Mizoram Khadi & Village Industries Board (MKVIB), Bank thawhpui, Commerce & Industries Department, Department of Information & Communication Technology (ICT) leh I&PR Department aiawhte an tel a ni.

Hun kaihruaitu Pu KC Lalmalsawmzauva chuan Mizoram Sawrkar Flagship scheme ‘Bana Kaih Scheme’ hmanga ram tih hmasawn hna thawhpui tur ‘Progress Partner’ thlan chhuah hna thawhkhatna chu tha taka kalpui a nih thu a tarlang a. Mizoram Sawrkar hnuai a Department 16 kaltlangin, theihna leh thiamna nei, eizawnna bultan tum te leh hma la tawh ten an hmalakna tichangtlung lehzual turin Bana Kaih Scheme hnuaiah dilna an theh lut tih sawiin, diltu 11456 an awm thu a sawi a. Implementing Department-a Nodal Officer-te, Bank lam te leh Apex Body-in uluk taka a zirchian hnu ah, Bana Kaih Scheme (Loan Component) hnuai ah mi 646 thlan an ni a, Chief Minister’s Special Package hnuaiah mi 2,257 thlanchhuah a nih tawh thu a sawi. Progress Partner thlan chhuahte tan hian Orientation training-te buatsaih niin an Bank Account-ah an hmalakna tur sum hi thun mek zel a nih thu a sawi. Bana Kaih Scheme hnuaia Progress Partner-te tha tih chakna tura loan ruahman sak ahte hian Sawrkar chu guarantor ah a tan bakah loan an lak atanga a pung awmte a rulh sak dawn avangin, hlawhtling tura theihna leh thiamna nei, mi taima leh rintlak chauh thlan chhuah an nih zel theih nan fimkhur takin Progress Partner thlanchhuah hna kalpui a pawimawh thu a sawi a. Tanpuina dawngte hmalakna pawh uluk taka vil chhunzawm tur a nih thu a sawi.

He thutkhawmah hian Bana Kaih Scheme dilna thehluhna Portal ennawn niin siamthat ngai laite sawi ho a ni a. Portal siamthat a, engemaw chen tih danglam a ngaih dawn avangin dilna thehlut tawh, ennawn tura Portal-a la awm mekte chu, Portal thar hman theih a peihfel a nih hun ah a thara thehluh a tul leh tur thu sawi a ni. CM Special Package dilna form ennawn a nih bakah Online-a dil theiha ruahman dan tur te, Progress Partner tur chu kum 18 atanga kum 60 inkar ni se tih a ni a, Mizoram Khadi & Village Industries Board chu Implementing Agency ah telh thar a ni bawk. Dilna lut tawh engemaw zah ennawn niin Commerce & Industries hnuai a dilna 18 ennawnte chu pawm a ni. Vawiin hian hmalakpui tura thlanchhuah Progress Partner-te loan dilpuina tur Detail Project Report (DPR) kimchang, awlsam taka siam a nih theih nana Application buatsaih thlir ho a ni a. Bana Kaih Scheme Phase II kalpui leh hmain Implementing Department hrang hrang hnuaia Nodal Officer-te tan DPR siamna application software hman dan training buatsaih dan turte sawi ho niin Bana Kaih Scheme Phase II chu August thla chhunga kalpui hman tum a nih thu tarlan a ni.