Chakma Autonomous District Council huam chhunga Kamalanagar ‘West’ By-Election chu vawiin khan boruak muanawm tak hnuaiah neih a ni.

#ZONEWS Kalamanagar August 06, 2025: Bialtu MDC Pu Sanjeev Chakma thihsan tak Kamalanagar ‘W’ MDC Constituency ah hian Polling Station 3 awmin, By-Election ah hian chuhtu Candidate 4 an awm a, ZPM Party candidate Pu Dinesh Moy Chakma, BJP Party Candidate Pu Joydeep Chakma, MNF Party Candidate Pu Rupyan Chakma leh INC Party Candidate Pi Kalpana Chakma te an ni.

Chawngte SDO (C) Pu Lalnunpuia Renthlei chuan Polling Station te hi tlawh kualin a vil reng a, Vawiin tlai dar thum thleng khan Polling Station pakhat Rajmandal chu inbiak pawhna lamah harsatna a awm avangin vote tlak dan dinhmun hriat a ni lova, Polling Station pahnih ah erawh vote awm zawng zawng atangin zaa 54.60 vote a tla tawh a ni. Rajmandal Polling Station ah hian vote 317 a awm bawk.

Kamalanagar West MDC Constituency a polling station pathum ah hian voter 1773 awmin mipa 883 leh hmeichhia 890 an awm mek a ni.

Vote thlak zawh a nih hnuah EVM te hi Lawngtlai pan pui nghal tura ruahman a ni a, ni 9 Inrinni khian vote chhiar a ni ang.