Champhai Bawrhsap hoin hunpui lo thleng tur a ruahmanna hrang hrang te thirho

#ZONEWS Champhai December 28, 2025: Vawiin khan Champhai Bawrhsap Conference Hall-ah  Bawrhsap Pu Mohammad Aaquib-a kaihhruaiin kan hma lawka Krismas leh kumthar hun pui lo thleng tur thlirhoin thutkhawm neih a ni a. He hunah hian Champhai SP Pu Lokeshwaran R leh a kaihhnawih sawrkar pisa aiawhte bakah khawpui chhung Village Council, Sub-Hqrs YMA, MJA leh Champhai District Dawrkai Association aiawh te an tel a ni.

He hun kaihruaitu Champhai Bawrhsap Pu Mohammad Aaquib chuan mipui ten Krismas leh Kumthar vuakvet thlamuang leh ralmuang taka an hman theih nan sawrkar, khawtlang hruaitute leh tlawmngai pawl te inkarah thawhhona tha a pawimawh tak zet tih a sawi a. Champhai khawpui fai leh thianghlimna atan theihtawp chhuah turin kalkhawm te leh mipui zawng zawng te a ngen tih sawiin,  hun pui lo thleng turah pawh faina leh thianghlimna ngaipawimawh turin mi zawng zawng a chah a ni.

He hunah hian Krismas leh Kumthar vuakveta venhimna kalpui dan tur te sawiho a ni a, uluk zawka venhimna kalpuina kawngah District Executive Force, Excise & Narcotics, Veng Welfare, YMA leh VDP te thawhho dan tur te ruahman niin, heng pawl hrang hrang ten anmahni zawn theuha ruahmanna an neih tawh te ngaihthlak a ni bawk. Hun pui lo thleng tura mipuite an him zawk nan khauh zawka lirthei vei vak te enkawl an nih tur thu te, halpuah leh halmawi khapna thupek bakah zu leh ruihhlo khapna te pawh khauh zawka kenkawh a nih tur thu te ngaihthlak a ni.

Champhai khawpui fai leh thianghlimna tura hmalakna kal mek pawh he hunah hian sawiho niin, District Urban Development Officer Pu Ngulzathuama chuan Mizoram Cleanliness Competition 2025 neih tura inbuatsaihna leh khawpui faina kawnga tan lak zelna turin hmalakna hrang hrang kalpui mek a ni tih a tarlang a. Village Council ten an huamchhunga ni za inhlawhna leh Finance Commission sum hmanga an din hmunhma te tihfai hna an kalpui mek thu te, VC tin ten an huamchhung theuhah December thla kar khatna a ral hma ngei a faina hnatlangpui an koh tur thu te, lirthei pawl – Auto Rickshaw, Taxi leh Sumo neitu ten faina kaihhnawih inzirtirna thuziak an tarlan sak thu te, Vengthlang dawr dung thla leh Tuipui Bazar vawngfai tura hmalakna kal mek te a sawifiah a, Single Use Plastic hman tlem chungchanga beihpui thlak an tum zel dan tur te pawh a sawifiah bawk a ni.