Champhaiah buhfai bukna endik a ni

#ZONEWS July 16, 2025: Vawiin chawhnu khan Addl. DC Pu K. Zorammuana leh DCSO Pu CC Sakhawliana te chuan DCSO hnuaia supply kudam a buhfai bukna an endik.

Addl. DC Pu K .Zorammuana chuan mipuiin an dawn tur buhfai buk tling ngei an dawn hi sorkarin a ngai pawimawh hle a, mipuiin an dikna chanvo an chan theihna turin kudama hnathawktute chuan retailer hnena an pek chhuah hmain buk tling ngeia pe chhuak tura chahin retailer te pawhin buk tling ngeia an lak chhuah theihna turin uluk taka lo enpui thin turin a chah bawk . Buhfai buk tling ngei chauh lak a nih theih nan buk tir nachang hre thin turin mipuite a chah nghal bawk a ni.

DCSO Pu CC Sakhawliana chuan buhfai pek chhuah turin buk a tlin loh chuan mipuiin kan lei tur ang zat kan lei theih loh thu leh a buk tling nena inang reng pawisa kan pek tho avangin pawisa an hloh then thin thu a sawi a. A buk tling ngeia buhfai lei chu mipuite chanvo a ni a, retailer ten mipui hnena an sem chhuah dawnin bukna khawl (Digital Weighing Scale) hmang ngei tura chahin, bukna khawl chhiat palh thulhah a suahnaa suak mai lova beam scale hmang thin turin a chah a, bukna khawl (Digital weighing Scale) chhiat thu rang taka DCSO hnena hriattir thin turin a chah bawk a ni.

Vawiina District Food and Civil Supplies & Consumer Affairs kudam a buhfai bukna an endiknaah hian buhfai retailer hnena semchhuah a nih hmain buk a tling ngei em tih finfiah nan, bukna khawl (Digital Weighing Scale) hmanga buk hmasak vek a ni a, buk tling ngeia pek chhuah a ni.

Buhfai bukna endiknaah hian Legal Metrology, Champhai District Consumer Union leh Retailer Association aiawhte pawh an tel a ni.