Champhaiah International Day Against Drug Abuse and Illicit Trafficking, 2025 puala essay inziahsiakna lawmman sem a ni

#ZONEWS July 16, 2025: Vawiin khan Champhai District Education Office bultuma International Day Against Drug Abuse and Illicit Trafficking, 2025 puala essay inziahsiakna result puan leh lawmman semna hun hman a ni.

He hun hi Education Training Hall, Kahrawtah hman niin Pu H. Lalengzama, Hindi Education Officer chuan a kaihruai a, Pi K. Lalsiamliani, DEO chuan ruihhlo laka fihlim a tul thu leh a dona kawnga zirtirtute leh zirlaite tun aia nasa zawka thawhho a tul thu a sawi a, ruihhlo ti mi tlemte zinga tel ve lo turin kalkhawmte a chah bawk.

Pu Samuel Lalrinzuala Chhangte chuan report pein result hi a puang a, intihsiaknaa titha pakhatna atanga pathumna latute hnenah lawmman tangkafai leh thuziak an hlan a, a bak titha zual mi panga te hnenah Consolation Prize, pawisa fai hlan an ni bawk.

High School Level-ah Ramngaihzuali, pawl 10, Govt. Champhai High School chu pakhatna a ni a, Zothansangi, pawl 10, Govt. TM High School Zote chu pahnihna niin Joseph Lalmawipuia, pawl 10, BC Lalthlamuana English Academy chu pathumna a ni. Middle School Level-ah Zomuanpuii Sailo, pawl 8, Presbyterian English School, Zote chu pakhatna a ni a, Elizabeth Lalmuanawmi, pawl 8, Einstein Middle School chu pahnihna niin Miriam Malsawmhlui, pawl 8, Govt. Bethel Middle School chu pathumna a ni.