Champhaiah National Deworming Day hman a ni

#ZONEWS Champhai August 11, 2025: Vawiin khan Govt. GM High School-ah 2025 chhunga a vawi hnih nan rulhut laka invenhim dan inzirtirna leh naupangte rulhut damdawi pek ni, National Deworming Day hman a ni a, Champhai Chief Medical Officer (CMO) Dr. R. Lalnienga’n chairman niin hun a kaihruai a, District Education Officer (DEO) Pi K. Lalsiamliani’n khuhhawnna hun a hmang.

DEO Pi K. Lalsiamliani chuan khawlaia inthiar awm tawh lo, Open Defecation Free (ODF) nihna kan nei a, faina leh hriselnaah hma kan sawn zel tih a sawi a. National Deworming Day hi rulhut laka kan invenhimna leh hriselna kawnga hma kan sawnna rahbi pawimawh tak a ni a, zirlai te’n an thil zir te vawnga inah leh sikulah hmang tangkai turin a fuih a ni.

He hunah hian Rashtriya Bal Swasthya Karyakram (RBSK) Medical Officer Dr. Rosie Rosangpuii chuan naupang hnenah zirtirna pein rulhut chungchang hriattur hrang hrang, a chi hrang awm zat te, rulhut pai inhriat dan te, taksa a nghawng dan te, inkai chhawn dan te, kut sil dan tur te leh invenhim dan tur hrang hrang a sawi a. RKSK Coordinator Pi K. Lalengliani’n rulhut leh a chungchangah naupang te zawhna leh chhanna hmanga intihsiakna hun (quiz) a hmanpui a ni. DPM Pi Lalramengi’n lawmthu sawiin hun a khar a ni. Zirlaite hnenah hian rulhut damdawi Albendazole 400 mg pek a ni.