Chawngte MaxiCab Welfare leh Chawngte Maxicab Owner Assn chuan Chawngte leh Rualalung khaw inkar kawng chhia avangin vawiin atang hian tlan tawh loh an tum.

#ZONEWS Chawngte August 11, 2025:
Chawngte Maxicab Welfare leh Chawngte Maxicab Owner Assn chuan Chawngte leh Rualalung khaw inkar kawng chhia avangin vawiin atang hian tlan tawh loh an tum.

Chawngte atanga thudawn danin Chawngte atanga km 1 pawh tlinglo, Rualalung nen an inkarah hian kawng hi namen lovin a chhia a, motor te a tlu a, innawr a, in pawhchhuah reng a ngai thin a ni an ti.

Hetihlai hian Bualte leh Thualthu inkar kawng min chu thenfai hleihtheih a la ni lo a. Kawngmin hian Lirthei a la dang tam hle a, an chaw ei tur buhfai, Alu etc DM&R DC Office lamin tumin heng hi Bualte khawtlang chuan an Kohhran Hall-ah an chhum sak thin a ni. Nimin khan BCM Hqtrs chuan khualzin tangkhang te ei tur lei nan cheng sing 2 Bualte khawtlang hruaitu te kutah an hlan ve leh a ni.

Lunglei SP Pu J. Lalmuankima chuan Akashvani Aizawl zawhna chhangin leimin chu thenfai hna thawh mek a nih thu leh Thualthu lam zawkah thenfai tur a la tam thu a sawi a. Lirthei kaltlang theiha an thenfai theih hun tur a la hriat loh thu sawiin khaw awm dan azirin a hriat theih chauh tur thu a sawi a ni. Bualte khua atanga thudawn danin leimin hi thenfai a nih lai-in kawng chhak lam atangin a min leh a. Tuna leimin an paih fai mek chu thenfai pawh ni se, a chhak lam tawlh zui tur a la awm leh a ni.

Lawngtlai West bialtu MLA Pu C. Ngunlianchunga chuan Mizoram chhim lam Lawngtlai leh Siaha district kalpawhna kawngpui pawimawh tak a pin avanga khualzin tangkhangte Bualte leh Thualthu khawtlangin an lo buaipui avangin lawmthu a sawi a ni.