CHIEF MINISTER IN SPECIAL SECRETARY & MEMBER, TASK FORCE ON DEREGULATION & REDUCTION OF COMPLIANCES BURDEN A KAWM

#ZONEWS Aizawl August 01, 2025: Vawiin khan Chief Minister Pu Lalduhoma chuan a office-ah Pu KK Pathak, Special Secretary & Member, Task Force on Deregulation and Reduction of Compliances Burden a kawm.

Chief Minister hian Pu KK Pathak leh a thawhpuite chu lo lawmin, an hmalakna chuan India ram leh Mizoram tan rah tha a thlen a beisei thu a lo hrilh a. Ease of Doing Business lama a kaihhruai sawrkarin hma a lakna tlangpuite lo hrilhin, kal dan tha zawk a awm phawt chuan a tul anga insiam tha turin kan inpeih reng a ni, a ti a. Hlim taka Mizorama an hnate thawk turin duhsakna a hlan.

Pu KK Pathak hian nimin lama Mizoram Chief Secretary nena an inkawmna leh Mizoram kalphung an zir dan te Chief Minister hnenah hian a thlen a. Mizoram sawrkar hmalakna chu a tha thawkhat hle a, amah erawh chu dan paih thawl ngai (deregulate) tur dang pawh a la awm nualin kan hria, a ti. India ramah Micro Small & Medium Enterprises bultanna leh hmasawn zelna tur remchang tam se ka duh a, MSME hmasawnna lamah hian kan thenawm ram te aiin kan chak lo deuh niin kan inhria a, anni leh pel a, kan ram economy chawikan nan MSME hi chak zawka kaltir kan duh a ni, tiin MSME hmasawnna tur chu an dah pawimawh ber thu a tarlang.

Building Law awlsam zawk leh hmasawnna hnathawh dawn a Forest Clearance awlsam zawka neih a nih theih dan tur te pawh an sawidun.

He Task Force hi sawrkar laipuiin MSME te tana ease of doing business (Awlsam zawka sawrkar kaltir dan) zawng tura a din a ni a. Cabinet Secretary chu Chairman niin central leh state sawrkar kalphung siam that ngai te zira a tul anga insiamrem dan tur rawt tu an ni.