CORRUPTION ZUNG, RESTRICTED TENDER! – ZK_BIKER

#ZONEWS #MIMAL_NGAIHDAN August 02, 2025:
ZPM *manifesto-ah* , “ _Loh theih loha Restricted Tender-a thawh ngai a awm a nih pawhin, dik taka dàn zàwm thlapa tih a nih ang,”_ tìin an ziak thlap a. Tin, CM ngei pawhin 24th August, 2023-a ZPM campaign kick off-naah, “Restricted Tender ringawt pawh kan tih ve loh hian kan sum dinhmun chu, chu chuan nasa takin a siam ṭha nghâl ringawt a ni,” tìin a lo sawi tawh bawk anih kha. Khatiang taka an ká an lo àn tawh avàng khán Kalphung Tharah hi chuan loh theih loh a nih loh va, CPWD Works Manual-in a sawi ang thlap a nih loh chuan Restricted Tender hi chu in ti ve lo tawp tùrah ka lo ngai a, ropui kan tì a ni. Nimahsela, kum khat leh a chanve vêl chauh an la Sorkár tihah Sorkár hmasâte tih aia hluar zâwk daihin, Restricted Tender blanket approval hial pêk a lo ni leh ta mai si hi a mak a, a pawi bawk a; hei hi mipuite hmáa mahni thutiam bawhchhiatna lian tak a ni.

17th April, 2025 khán Finance Department chuan SASCI project ₹629.17 crore man, hna 76 zet chu Restricted Tender approval pêk a nih thû a chhuah a ni. Hei hi a chhan chu hna hmanhmawhthlâk, kumin 2025, 31st December-ah chuan thawh zawh ngei ngei tawh tùra an tih vàng a ni. Nimahsela, Restricted Tender hman nán hei hi chhuanlam a tling lo. A chhan chu, Open Tender aia Restricted Tender hian process chhúng hun a heh zawk vàng a ni.

Restricted Tender dik takah chuan inbuatsaih chhúng ringawt pawh hian hun a duh a ni. Amaherawhchu, Restricted Tender lemah erawh chuan thuneitûte’n an duhsak záwngte contract hnà an pêk theih nán dàn palzutin awlsam tak leh rang takin an ti liam puat tawh mai ṭhìn a ni.

Hetiang dàn ṭha tak leh fel tak kan neih reng laia, a hmanhmawhthlâk tih chhuanlama Restricted Tender lem blanket approval pêk ringawt hi kalphung dik a ni lo. Dikna leh hna ṭha duh vàng ni lo vin, system corrupt tak, thuneihna hmangsuala, dàn palzúta, duhsak záwngte vùr tum vàng mai mai a ni. Sorkár-in he Restricted Tender blanket approval a pêk chhan ber hi chu, MLA leh Minister-te’n share an neiha, an inthlan sènso an hmuh lêt lehna tùr, a rûka contractor aikal an lâkna hmanrua leh an sum siamna ‘Corruption Loophole’ lian tak a ni ngei ang tih a rin theih a ni.

Tin, kan ramah hi chuan Restricted Tender a nih vàngin hnà hi a chak kher lo va, a ṭha kher lo bawk tih a chianna chu, Ramrikâwn to NH-54 via Sakawrtuichhùn kawng siam hnà an thawh mék khu a ni. Hna hmanhmawhthlâk tih chhuanlamin ZPM Party in Sorkàr hlim phat, nikum 2024 chawhma lam daih tawha Restricted Tender lem approval a lo pêk kha a ni a. Nimahsela, nasa taka innawr avàng khán cancel leh a ni, Open Tender-a tih tùrin a nih kha. Amaherawhchu, sawi anga Open Tender-a ti ta lo chuan, Departmental Works lem hmangin ZPM Party hruaitû pakhatin a lo thawk daih mai a, nimahsela vawiin thleng hian a la zo thei si lo a nih hi. Engpawhnise, he Sakawrtuichhùn kawng siam hnà aṭanga chiang êm êm chu, Restricted Tender leh Restricted Tender lo hi hna chak leh chak loh, hna ṭhat leh ṭhat loh hriltû a ni lo tih hi a ni. Restricted Tender hmang khán lo thawk tâ pawh ni se, a la zo chuang lo vang. A chhan chu a thawktû hi a ngai reng dáwn tih a chiang ang bawkin, a hnà pawh a ngai reng dáwn tih a chiang bawk a ni.

Restricted Tender emaw, Open Tender emaw hian hna chak leh muan a hril lo. Hna chak leh muan hriltû chu contractor ṭha leh ṭha lo an ni zâwk. Hna thawk ṭha leh zo rang tùr chuan Restricted Tender emaw, Open Tender emawah a innghat lo va, contractor ṭha leh rintlâk, hnathiam leh experience ngah, kháwl leh hmanraw nei ṭha leh sum ngah lamah a innghat zâwk a ni. Restricted Tender-a chhuah a nih vàng ringawtin contract hnà hi a chak phah lo va, Open Tender a nih vàngin a muan phah hek lo; contractor azir a ni zâwk.

Tin, Restricted Tender chungcháng hi CM ngei pawhin Sorkár hmasa term-a Opposition Group Leader a nih lai khán a sawifiah ṭha khawp mai a. Heti hian Assembly House-ah a sawi a nih kha: “Restricted Tender inpêk hian dàn 5 pawimawh tak tak a bawhchhia a ni.

1-na: Rule 162, General Financial Rules 2-na: Rule 16, Public Procurement Rules

3-na: Central Vigilance Commission circular No. 04/04/21 4-na: Article 14 of Indian Constitution

5-na: Supreme Court ruling SPL Civil No. 10174 of 2006

Hêng zawng zawng hi Mizorama contract kan inpêk dàn hian a bawhchhe par par a,” tìin a sawi a nih kha. Heta a thusawi hi a ṭhain a pawimawh tak zet a ni. Amaherawhchu, Opposition Group Leader a nih lai leh tûna Chief Minister a lo nih tâk hnûa Restricted Tender leh Restricted Tender lo vah pawh, contract hnà inpêk dàn zawng zawngah danglamna awm lo va, Sorkár hmasâ tih dàn leh Sorkár thar tih dàn a la pangngai reng erawh hi chu a lungchhiatthlâk tak zet a ni.

ZPM Party hi Party dangte aia danglam bîk tùr leh ṭha bîk turin Zoram mipuite hian a engah hmáin kan phût nghâl ringawt lo. Anmahni zâwk insawi dàn leh in inzawrh dàn a nih miau avàngin danglam bîk tur leh ṭha bîk tùr, kal hmasâte tih ang ti ve loh tùrah kan ngai lo thei lo a ni. ZPM Party lakah mipuite hian a engah hmáin kan phût sáng nghâl ringawt a ni lo, anmahni intiamkamna level a sàn êm avàngin an laka phût sáng lo thei lo vin mipuite min siam zâwk a nih hi. Zoram mipuite hian Congress leh MNF aia an ṭhat leh ṭhat loh kan khaikhin lo, ZPM Sorkár hian an ṭawng an ûm phâk ngei kan duh mai a ni.

Amaherawhchu, hei, kum khat leh a chanve lek ro an han rèl meuh chuan an insawi ang chu an lo ni hauh lo mai a, beisei an pha lo nasa hle a ni. Tin, Restricted Tender-ah ngat phei hi chuan Sorkár hmasate tih aia hluar zâwkin, Restricted Tender lem blanket approval hial an han pe ta mai hian min barakhaih tak zet a ni! Thuneihna hmangsuala, dàn palzúta contract hnà hmanga sum siamna lamah pawh Kalphung Hluiah leh Kalphung Tharah hian danglamna hmuh tùr engmah a awm lo a nih hi. Hei hi a pawi tak zet a ni.

Corruption hi ZPM sorkar hian a zungah zung a kaih tirin a phun belh sauh sauh zawk a ni.