Deputy Speaker hovin Kolasib District-a National Highway siamthat hna thawh chungchang sawiho

#ZONEWS Kolasib October 31, 2025: Vawiin khan Mizoram Legislative Assembly Dy. Speaker Pu Lalfamkima, Kolasib bialtu MLA ni bawk kaihhruaiin, Kolasib District paltlangtu National Highway (NH-306/06) siamthat hna thawh dan tur chungchangah NHIDCL hotute leh an hnuaia contractor-te nen meeting pawimawh neih a ni.

Thutkhawmna ah hian Pu Lalfamkima chuan fur ruah tui a zawh tawh avangin hna thawh tan theih a ni tawh tiin, NHIDCL leh contractor-te an inbuatsaih dan a zawt a. NHIDCL hotute chuan an hmalakna hrang hrang tarlangin, Buichali atanga Khamrang kawng chhe zual lai siam an zawh hnaih tawh thu leh Kawnpui leh Khamrang khawih chhunzawm mek a nih thu an sawi . Kolasib atanga Kawnpui inkar siam that leh tur niin, tunah hian side drain siam hna kalpui mek a ni an ti.

Black topping hna thawh tur chungchangah, contractor ten repairing hna an tih hmasak phawt tur thu sawiin, Kolasib leh Bilkhawthlir inkar black topping hi November thla chawhnu lam atanga tan tum a nih thu an sawi a. Amaherawhchu, hna thawh nan a mamawh hot mix plant chu Mizoramah a lo la thlen loh thu an sawi bawk. Tunah hian kawngpui khu lutuk ti ziaawm turin tui an phuh tan a, nikhatah vawi hnih phuh tura tih ni mah se, tui harsat avangin an tihlawhtling thei rih lo tih an sawi .

He kawngpui siam hna hi Kolasib District chhungah contractor pathumin an thawk mek a. Vairengte atanga Bilkhawthlir leh Kolasib-Kawnpui inkar chu Balaji Company-in an khawih a; Bilkhawthlir-Kolasib leh Kawnpui-Khamrang inkar chu J. Infratech-in an khawih laiin, Khamrang atanga Buichali chu BR Goyal Infrastructure ten an enkawl thung a ni.

Meeting-ah hian NHIDCL hotute leh contractor-te chuan harsatna an tawh te sawiin, Kolasib khawchhung, Rengtekawn thlengin kawngpui area nek an tam a, heng hian side drain a hnawh avangin kawngpuiah tuihawk a luang thin a, kawng a chhe hma niin an sawi a, hemi chungchangah hian hmalakpui turin Dy. Speaker chu an ngen a ni. Hemi bawhzui hian District Magistrate kaihhruaiin Police, Revenue, Sub-Hqrs YMA, NHIDCL leh contractor-te telin kar lehah enfiah nise, tih a ni.

Hei bakah hian Kolasib khawpui chhung, Diakkawn leh hmun engemawzat chu Bialtu MLA ruahmanna angin Pavement Quality Concrete (PQC) a siam tum a nih thu leh, hemi atan hian NHIDCL Headquarter-ah proposal siam tum a nih thu  an sawi tel bawk.

Meeting-ah hian Kolasib Sr. SP Pu David H Lalthangliana, Addl. DC Pi B Malsawmtluangi, Pu H Lalramliana, SDO (S) te, Kolasib Joint VC chairman Pu Lalhmachhuana, Sub-Hqrs YMA leh MJA aiawhte bakah NHIDCL Gen Manager Pu BK Srivastava te, Project Manager Shaksham Tyagi leh an hnuaia contractor-te an tel a ni.