Deputy Speaker in Kolasib MLA Constituency atanga tun hnaia UG/PG result chhuaka top 10 a lang te hnenah Laptop a hlan.

#ZONEWS Kolasib July 29, 2025: Vawiin khan Government Kolasib College ah University UG/PG exam a Kolasib MLA Constituency atanga Top 10 a tlingte chawimawina leh thilpek hlanna hun hman a ni a. He hun hi Pu Lalfamkima, Deputy Speaker, Mizoram Legislative Assembly leh bialtu MLA nibawk chuan telpuiin, zirlai tithate hnenah hian laptop pakhat theuh a hlan a ni.

He hunah hian Pu Lalfamkima, Deputy Speaker chuan thu sawiin, a bial chhungah zirna ah hmasawnna leh result duhawm tak tak nei an awm chu lawmawm a tih thu sawiin a lawmpui takzet a ni a ti a, an kal leh zel na turah duhsakna a hlan nghal a ni. Vawiina zirlai titha kalkawmte chu Khawvel tukverh a dak chhuak tak tak turin kailawn pawimawh takah an ding chho a ni ti in, an hma ah kawng pawimawh tak a la awm a, chu kawng chu zawh a hlawhtlinna chang ngei tur chuan theihtawp a tan an lak a, tumruhna nen an beih a ngai a ni, a ti.

Pu Lalfamkima chuan zirna a ngaih pawimawh thu sawiin, quality education a awm theih nan amah ngei pawh a theihtawp in a tang ve hle thin a ni, a ti a. A bial chhunga zirlaite leh thalai hna hmulo tamtak te chuan zirna sang zawk leh hna tha tak tak an thawh chu a duhsakpui takzet a ni tiin, kolasiba MYC coaching center awm te pawh an hman tangkai a pawimawh takzet a ni, a ti. Tunlai khawvel intihsiakna sang tawh tak ah hian exam pawh a fair tawh hle a, hna insawipui te chu thil tih chi a ni tawhlo hrim hrim a , chuvang chuan anmahni in an theih ang tawka an beih a, tumna sang tak nena an zirlai te an zir a pawimawh a ni, a ti. Zirlaite chu ruihhlo lakah an fihlim ngei tur a ni tiin, zu leh drugs leh a kaihhnawihte chu ti ve lo turin a chah a, anmahni mai piahlamah a that lohzia an thiante leh midang hnena sawi darh zel turin a chah bawk.

Kolasib MLA Constituency atanga UG/PG exam a top 10 a tling te puala hun hmanna ahhian Govt Kolasib College zirlaite leh chawimawina dawngtu nu leh pa te an tel a . He hun hi Pu Laltanpuia Rengsi, Principal Government Kolasib College chuan a kaihruai a, Deputy Soeaker in thusawi a a neih zawh hian Pu Christopher JZ Lawlor , Vice Principal , GKC chuan zirlaite hnenah fuihna thuchah a sawi nghal bawk. Thusawina neih zawh hian zirlai top 10 a langte hnenah hian lawmpuina thilpek semna neih nghal niin, Pu Lalfamkima, Deputy Speaker in Laptop pakhat theuh a hlan a ni.

Vawiina zirlai titha chawimawina dawng te hi an vaiin mi 7 niin, an hming, an khua leh college te a hnuaiah hian tarlan an ni.

List of Rank Holders

1. Irene Lalrinengi D/O S.Rohlua (L),
New Diakkawn, Kolasib.
M.A Gold Medalist (Dept.of English);
ICFAI UNIVERSITY

2. Lalhmangaihsanga S/O R.Zosangliana,

Bairabi ‘S Ramhlun Veng.
2nd Position BA (Geography);
GOVT. KOLASIB COLLEGE

3. Vardawngzeli D/O Lalhriatpuia,

Bairabi ‘S Mission Veng.
3rd Position B.SC (Botany);
GOVT. ZIRTIRI RESIDENTIAL
SCIENCE COLLEGE

4. Emmanuel Lalpekhlui D/O Lalzarzovi,
Project Veng Kolasib.
5th Position, B.A (Philosophy);
PACHHUNGA UNIVERSITY COLLEGE.

5. T. Lalbiakhlua S/O T.Lalremruata;
Diakkawn, Kolasib 3rd Position, BCA
NATIONAL INSTITUTE OF ELECTRONICS & INFORMATION TECHNOLOGY (NIELIT)

6. Lalduhsaka S/O LR. Hmachhuana Sailo;
Diakkawn, Kolasib.
8th Position MA (Dept.of Geography),
MIZORAM UNIVERSITY.

7. Baby Lalnunngili /Do Lalrindiki
Venglai Kolasib
4th. Position, MSc (Geography)
MIZORAM

Dr. PC Lalremruata, Assistant Professor
Department of Botany, GKC in lawmthu sawina a neih zawh in vawiina Zirlai tithate puala hun hman na hi tihtawp a ni.