DM&R MINISTER PROF. LALNILAWMA’N BAWNGKAWN SHALOM VENG PRESBYTERIAN KOHHRAN BIAKIN KANG TLAWH

#ZONEWS Aizawl November 20, 2025 : Nizan dar 7:30 vel khan Bawngkawn Shalom Veng Presbyterian Kohhran Biak inah kangmei a chhuak a, Disaster Management and Rehabilitation Minister Prof. Lalnilawma chuan kangmei chhuah rual hian a hmunah kalin a tlawh nghal a; kangmeiin thil a tih chhiat dante, kohhran leh khawtlang hruaitute nen enho niin, a tul tula hman atan tanpuina cheng 5000 a hlan nghal bawk. Minister hi Aizawl DC Pu C Lalhriatpuia leh Aizawl District Disaster Management Authority aiawhte’n an tawiawm a ni.

Kangmei chhuah chhan hi eirawngbawlna gas leak vang nia hriat a ni a, Biak in hnuaia chowkidar quarters atanga chhuak tan a ni. In kang thelh tur hian vengchhung mipui leh kohhran mite tlankhawm nghalin a theih ang angin bungruate seng hawi nghal a ni a, mei hi thelh mih mai theih a nih loh avangin Fire Brigade biak tlang nghal an ni a; mei sipaite’n rang taka kang thelh hna thawk nghalin, pawi nasa lehzual a thlen hmain kangmei hi an thelhmit hman a, mihring thi leh hliam an awm lo a ni; amaherawhchu kangmei chhuakah hian kohhran go down a kan tel avangin chowkidar-te bungrua bakah kohhran bungrua eng emaw zat a kang chhe hman a ni.

DM&R Minister chuan kangmei tuartute a tuarpui thu sawiin mitinte kangmei laka fimkhur thar leh theuh turin a chah a, khua a lo tuihul leh tan tawh avangin, in leh a velte vawngfai a, kangmei ti punlun thei thil hrang hrangte ngai pawimawha, hnim leh bawlhhlawhte pawh thian fai fo thin turin mipuite a ngen a ni.

KANGMEI CHUNGCHANGA MIPUITE HRIAT TUR PAWIMAWHTE:-

1) Mahni in kang pawh ni se, fimkhur lohna (negligence) a tel deuh zel avangin IPC/BNS dana hrem theih niin, pawisa chawi leh lung in hial tan theihna a ni tih hriat tur a ni.

2) In leh a velah kangmei tichhuak thei a awm em tih en fiah fo thin tur a ni

3) Mei chhem chi – meihawl, vawkchaw chhumna te, thildang kangkai thei lo tura siam tur.

4) Gas Cylinder leak hman hi thil hlauhawm tak a ni a, en fiah fo thin tur a ni.

5) Petrol, diesel leh oil lam chi reng reng, mei bul hnaiah dah reng reng loh tur a ni.

6) Electrical wiring tha lo hi ‘shortage’ siamtu a ni a, a thiam ngeite chauh siam tir thin tur a ni.

7) Circuit breaker hman ngei tur a ni a, fuse-wire pawh a dik tak chauh hman tur a ni.

8) Parda, thosilen leh puanzar bulah mombati/bati chhit loh tur.

9) Thlasik laia meihawl thuk tihmit that loh hi in kanna bul a ni thin a, tihmit kim ngei ngei tur.

10) Gas bur i thlak dawnin, a bur thar zawkah chuan rubber ring/washer tha tak a awm ngei tih fiah phawt tur a ni.

11) Gas bur hi meiin nasa taka a tih sat phawt loh chuan a puak mai lo a; a kan pawhin a puak tur ven nan tuia leih daih char char tur a ni.

12) Meichhemna thil – nawalh leh lighter te naupang/rilru kim lo (pyromaniac) khawih phakah dah loh tur a ni.

13) In leh a vela bawlhlawh kang theite, then fai fo tur a ni.

14) Electric istiri, heater leh room heater te ‘ON’ chungin chhuah san loh tur.

15) Broiler ar vulhna emaw, ran in emaw-a electric chhitte’n thil dang a ti kang thei tur a ni lo.

CHHIATNA NASA ZAWK A THLEN LOH NANA HRIAT TUR DANGTE:

Thal laiin In leh ram kang kan nei fo thin a; khawnawta a huhova kang thelh tura thawh chhuah chang a awm thin a, chungahte chuan hengte hi hriat reng tur a ni ang.

• Hnathawktute chu a inkawpin thawh tur a ni. Maltlat loh tur.

• Thuamhnaw, cotton-a siam ngei hak a tha ber a, a ban tluan ngei ni se. Heng bakah hian lukhum, kutkawr, tuithawl, tarmit (a rem chuan), chem, puanhlap pakhat leh hmehen ken tel a tha. Pheikhawk pum bun ngei bawk tur a ni.

• Insasengna tur hmun leh kawng ruahman lawk a tha.

• Hotu leh val upate thu ngaihchan tur a ni.

• Hnathawh hmain tui tam tawk in tur a ni.

• Mahni thuamhnawte tuia tih huh hmasak vek bawk tur a ni.

• Mei khu nasa vanga thawk a buai loh nan rawmawl hnawm chip chep neih tur a ni.

• Mual leh mualin a kar cheh ruamah awm loh tur.

• Thing ro ding leh thing zar tliak tawh tla mai thei lakah fimkhur tur a ni.

• Ram chin hre chiang lo chu a hre chiang bulah chauh hna thawh tur tur a ni.

• Ruahmanna awm reng reng hnathawktu zawng zawngin an hre tur a ni.

• Hnathawktute inbiakpawh reng tur a ni a, kan inbiakpawh theih loh chuan dinhmun hlauhawmah kan awm nghal tih hriat reng tur a ni.

KANGMEI A CHHUAH THUTA FIRE STATION BIAK PAWH THEIHNA TURTE:

1. Aizawl F/S : 0389-2322384 / 9436730440
2. Bawngkawn F/S : 9436727944.
3. Khatla F/S : 0389-2336406 / 9436730450 or 101
4. ITI F/S : 9366984684
5. Kulikawn F/S : 0389-2312000 / 7628053799
6. Lunglei F/S : 0372-2324101 / 0372-2325366 / 8794889383
7. Siaha F/S : 03835-223085 / 9612230834
8. Champhai F/S : 03831-234026 / 7628029288
9. Kolasib F/S : 03837-220101 / 7627966100
10. Serchhip F/S : 03838-222135 / 8119884154
11. Lawngtlai F/S : 03835-232801 / 9366593622
12. Mamit F/S : 0389-2565077 / 7628026822
13. Tlabung F/S : 03834-222189 / 7630035803

Attachment