DUET PAINTING EXHIBITION HAWNG

#ZONEWS Aizawl, October 21, 2025 : Pu David Ralte, Champhai Ruantlang leh Pu Lalrammawia, Durtlang North te lemziak phochhuahna “Duet Painting Exhibition” chu Art & Culture Director Pi Carol VLMS Dawngkimi’n mipui tlawh theih turin vawiin khan DIPR Lianchhiari Run Conference Hall, Treasury Square-ah a hawng.

He painting exhibition hi Lianchhiari Run Art Gallery, I&PR Building, Treasury Square, Aizawlah neih a ni a, painting exhition ah hian thlalak 45 pho chhuah niin, a duh a piang tan ni 21 – 24, October, 2025 inkar chhungin chawhma dar 10:00 atanga tlai dar 4:30 thleng a tlawh theih a, painting lei duh tan a lei theih bawk ang. Painting hi medium hrang hrang Acrylic on Canvas, Water Colour Painting leh Oil Painting te an ni.

Duet Painting Exhibition hawnna inkhawm ah hian khuallian Pi Carol VLMS Dawngkimi chuan lem ziak mite fuihin, Art Gallery nei uar turin a chah a. Tourist/khualzin rawn kal tam tak ten mizo thil phochhuak thei lem ziak lei tur an hmuh zung zung theih nan lem ziah lama hma la nasa turin a fuih a, social media platform hrang hrang ah nasa leh zual a in pho chhuak turin a fuih a ni. Inkhawmna tawi hman zawh hnuin exhibition hi a hawng zui a ni.