Mizoramah Brahmaputra Board meeting nei

#ZONEWS Aizawl October 17, 2025 : Vawiin khan Irrigation and Water Resources Department, Government of Mizoram chuan Brahmaputra Board meeting a thleng a, meeting hi Planning and Programme Implementation Department Conference Hall, Aizawlah neih a ni.

Brahmaputra Board hi Brahmaputra leh Barak lui-a luang lut lui, NE States a lui hrang hrang te, enkawltu, thuneihna sang tak nei a ni a. NE States hrang hrangte bakah Sikkim leh West Bengal-te pawh he Board-ah hian an tel a ni.

Irrigation & Waters Resources Department, Government of Mizoram hian Brahmaputra Board puihnain Springshed Management Pilot Project (100% funding) Dialdawk leh Sihphirah a lo kalpui tawh a, heng project te a hi hlawhtling hle nghe nghe a ni. Tunah hian Tlawng lui tuihna ti pung tura hmalaknana DPR siam chu Brahmaputra Board hnuaiah IIT Roorkee in a kalpui mek a ni. Luitui lian in leilet ram tha a tihchhiat venna tur proposal IWRD in a thehluh “Anti Erosion Scheme or Flood Management Programme” DPR te pawh duan mek a ni.

Chawhnu lamah Aizawl leh Lunglei tui tlan ber Tlawnglui pawimawhna leh a luitui tlem zel tihpun dan tur sawihona, ‘Stakeholder Consultation on Revitalising Tlawng River through Springshed Management & Allied Strategies’ chu neih a ni a. Sawrkar department hrang hrang leh MZU, CYMA, Save the Riparian, Centre for Environment & Social Justice, Project Save Tlawng te an tel. IIT Roorkee atanga mithiam lo kal te bakah PHED leh Irrigation & Water Resources Dept. atangin paper present ngaihtlak leh sawiho a ni a. Chawhnu lam hun hi Chief Minister Pu Lalduhoma’n a hmanpui a ni.

He Board meeting hi Chairman Dr. Ranbir Singh, IAS (Rtd) in a kaihhruai a, Ministry of Jal Shakti lam atangin Shri Gaurav Masaldan, Jt.Secretary & Financial Adviser in a rawn telpui bawk.  NE States hrang hranga Tui leh a kaihhnawih Department enkawltu  Secretaries-te chu Board Member an nih angin he meeting-ah hian an rawn tel hlawm a ni. He meeting-ah hian Agenda pawimawh tak tak ngaihtuah leh sawiho niin, heng zingah hian Mizoram atanga project proposal pali a tel a ni.

Attachment

#ZONEWS Mamit October 17, 2025 : Vawiin khan 2-Dampa (ST) AC By-Election neihna tura inbuatsaihna hrang hrang enpuiin Sh.Vijay Gupta,Section Officer, Sh.Vibhor Agrawal, Under Secretary leh Sh.Hemant, Assistant Section Officer, Election Commission Of India te chuan District Election Office Mamit an tlawh a, Pu K.Laltlawmlova, District Election Officer kaihruainain DC Conference Hall, Mamit-ah, SP Mamit, RO, ARO leh Nodal Officers te nen meeting neih a ni.

Vawiin thutkhawmah hian Election Commission of India aiawha kalte hian 2-Dampa(ST) AC By-Election atana inbuatsaihnate chu enpuiin, EVM Strong Room leh Returning Office te an tlawh a, inbuatsaihna hrang hrang kalpuite pawh tha an tih thu an sawiin, boruak muanawm leh ralmuang tak hnuaia inthlanna kalpui a nih theih nan theihtawp chhuah zel turin an chah bawk.

Pu Lalnunfela Chawngthu, Election Officer chuan 2-Dampa (ST) AC dinhmun leh By- Election neihna atana inbuatsaihna hrang hrang kalpui tawhte leh hmachhawpte a lem nen chipchiar takin a tarlang a. 2-Dampa bial chhunga Polling Station 41 te dinhmun a tarlan zingah Critical Polling Station Silsury I,II,III bakah Zopui Polling station kawlphetha luh lohna leh ke a kal ngai dinhmunte a tarlang tel bawk.

Vawiin hian Pu Manny Bhushan Singh, SP Mamit, Pu Malsawmzuala, Returning Officer, Pu Lalnunfela Chawngthu, Election Officer, Assistant Returning Officer bakah Nodal Officers-te an tel a ni.