Fak phu Khenglawt tlangval Joshua Van

Joshua Van hmasawn dan leh, tuna a dinhmun thleng tura a beih dan en hian fak chu a phu a ni. Zofa kan nihna anga kan thisen zawmpui hnai vai tak a nih avangin fak leh chawimawi hi a phu ve hrim hrim bawk. Tun hnai chhoa a hlawhtlinnate hi chhinchhiah tlak tak vek a ni.

Japanese Rei Tsuruya chu UFC 313-ah March, 2025 khan a hneh a.

June 7, 2025 khan Brazilian Bruno Silva chu UFC 316-ah a Knock Out-a.

UFC 316 hnuah kar 3 chiah inbuatsaihna hun a nei chungin Royval chu June 28, 2025 khan UFC 317-ah hnehin Champion lai, Alexandre Pantoja cho thei turin a inhlang kai leh thei a ni.

Joshua Van hian Thla thum leh ni 20 chhungin insual vawi thum a hmachhawn a, a vaiin a chak vek bawk.

Champion lai Pantoja a insualpui thei a ni satliah lo a, Kum kal lai chhunga insual hmuhnawm ber (Best fight of the year) ni thei khawpin Royval nena an insual kha a hmuhnawm a ni. A hming lema, “The Fearless” tia an phuah sak hial khawpin bawm chhungah hlauh a nei ngai lo. A zawna vawi 5 chakin Flyweight huangah hma a sawn chak hle a. Beiseina nen a thlir thin kha a tak a chang ta. Champion turin hun remchang tha tak a nei a. UFC ngaihventuten mak an ti a, hahipin an sawi a, an fak mek a ni.

#zonews #chanchinthar #infiamna