Health Minister Pi Lalrinpuii’n Mizorama a hmasa ber atan “Healthy Lunglei Initiative” hnuaiah Civil Hospital Lunglei leh PHC Lungsena Health ATM bun thar a hawng

#ZONEWS Lunglei August 18, 2025: Mizorama Health ATM hmasa ber, Lunglei District Administration hma lakna, “Healthy Lunglei Initiative” hnuaia Civil Hospital Lunglei leh Primary Health Centre (PHC) Lungsena khawl bun thar chu vawiin khan Mizoram Sawrkara Health & Family Welfare Minister Pi Lalrinpuii’n a hawng.

Health ATM thar hawnna hun, Civil Hospital Lunglei Seminar Hall-a buatsaihah Health Minister Pi Lalrinpuii chuan Mizorama Health ATM hmasa ber hawngtu a ni chu vannei a intih thu sawiin, Lunglei District mai ni lo, Mizoram State pum pui tan he hun hi hun ropui leh chhinchhiah tlak tak a ni, a ti a. June 2024-a ama hova hawn, Healthy Lunglei District Campaign hnuaiah natna inkai chhawn theih loh (non-communicable disease – NCD) endikna leh a chungchang inzirtirna ngawrh taka kalpui a nih thu leh mipui vantlang thawhpuina azara hriselna lama ṭhan harhna leh hmasawnna hmuh zel a nih thu sawiin, tuna Health ATM hawn a ni leh ta chu he hma lakna hlawhtlinna belhchhahtu a nih thu a sawi.

Health ATM chu mipuite’n rang taka mahni hriselna dinhmun — BP, zunthlum, taksa inphut dan (BMI), taksaa boruak thianghlim oxygen awm zat, leh thil dang tam tak hriat nan a hman theih dawn tiin, a khawlte chu IoT (Internet of Things) technology nena thuam a nih avangin, result a pek chhuah zung zung bakah, a hmangtute hriselna dinhmun chu lo chhinchhiahin, digital health record a vawng ṭha nghal zel dawn a, inentir tura damdawi in lian zawk pan nana sum, hun leh tha tam tak sen ngai ṭhin chu eng emaw chen a chhawk zangkhai thei dawn a ni, a ti.

Health Minister Pi Lalrinpuii chuan Healthy Lunglei District Campaign bakah, Lunglei DC bul tuma ngaihsak leh ngaihven ngai zualte huap zova hriselna kawnga hma lakna — Project LEAP kal tlanga vohbikte hriselna dinhmun endik leh mi 700 chuang hnena ṭanpuina hmanrua sem chhuah a ni te, Project BLOOM hnuaia Lungsen Aspirational Block huam chhunga nu leh naupang hriselna atana hma lak a ni te chu hlu leh chhuanawm a tih thu a sawi a. Health ATM atana CSR hai chhuaktu DC Office te, CSR sum petu ABCI leh BRN te leh khawl mamawh buntu MVS India te chungah lawm thu a sawi a. Health ATM chu Lunglei District hrisel, fei leh chak zawk dinna hmanrua a nih a beisei thu sawiin, mipuite chu ṭangkai taka hmang turin a chah.

Health ATM hawnna hunah hian Lunglei High Powered Committee (HPC) Vice Chairman Pu V. Malsawmtluanga, Lunglei South bialtu MLA Pu Lalramliana Papuia, Lunglei Municipal Council (LMC) Chairman Pu Lalzuithanga leh councillor-te, sawrkar official-te, ABCI, BRN leh MVS India ai awhte, kohhran leh tlawmngai pawl ai awhte, political party hruaitute, media-te, damdawi ina thawkte leh Nursing School Lungleia zirlaite an tel a. Additional Deputy Commissioner Pi Zoramdini’n hun kaihruaiin, inlawmna thu a sawi a. Baptist Church of Mizoram pastor Rev. V. Lalzarliana’n hunserh hmangin, Lunglei Bawrhsap Pi Navneet Mann chuan Health ATM bun tura hma lakna tlangpui a tar lang a. DHME Director Dr SR Ngurchamliana leh Lungsen Block Development Officer Pu Lalhruailiana Zote te’n thu an sawi bawk.

Health Minister Pi Lalrinpuii chuan Civil Hospital Lunglei NCD Clinic-a Health ATM bun thar chu a hmunah hawngin, PHC Lungsena mi chu ral aṭangin biakhmuhtheihna kal tlangin a hawng bawk a. CHL NCD Clinic-a Medical Officer Dr Lalremmuana Ralte chuan Health ATM hman dan a taka entirin, Health Minister chu Health ATM hmang hian a hriselna dinhmun endik nghal a ni bawk.

Health Minister Pi Lalrinpuii hian Civil Hospital Lungleia Integrated Public Health Laboratory sak thar leh luah luh thar bakah, Trauma Centre building-a Mizoram Universal Health Care Scheme (MUHCS) hnuaia damlo na zual enkawlna tur, Intensive Care Unit (ICU) siam thar chu tlawhin, a enfiah nghal bawk.

CH Lunglei leh PHC Lungsena Health ATM bun tur hian Manav Vikas Sanstha (MVS India), Lunglei Deputy Commissioner Office leh ABCI Infrastructures Pvt. Ltd te’n inremna, Memorandum of Understanding (MoU) ziakin, ABCI leh BRN te chuan CSR kal tlangin Health ATM leina leh enkawl zuina tur sum tumin, MVS India chuan a khawl bun, training pek leh a khawl vil zui kawngah mawh an phur a, DC Office chuan a enkawlna leh hman zuina tura ruahmanna hrang hrang an bawhzui ve thung dawn a ni.

Health ATM-ah hian test chi hrang hrang 35 vel tih theihin, taksa nihphung tlangpui, zunthlum, thisensang, lung lam, beng, mit leh rilru lam dinhmun te a endik theih dawn a. Hriselna atana ei leh in fimkhur dan tur thurawn te pawh a awm bawk a. Test hrang hrang hi a thlawn veka tih theih niin, darkar chanve tling lova tih zawh vek theih a nih bakah, test result hi mahni phone-ah a dawn nghal theih bawk.