Mizoram pumah a vawikhatna atan Electric Billing System chi khat hman a ni ta

#ZONEWS Aizawl August 23, 2025: Nimin khan Power & Electricity Department chuan E-in-C Conference Hall, MINECO ah UGO Electric Billing Software thar tlangzarhna, Revenue Drive kharna leh revenue collection lama Division tithate lawmman semna hun an hmang a, he hunah hian Pu F. Rodingliana, P&E Minister chu khuallian niin UGO Electric Billing Software thar tlangzarhna hun a hmang a. Khualzahawm Pi K. Lalrinzuali, Secretary, P&E pawhin thu sawina hun a hmang a ni.

UGO Electric Billing Software thar tlangzarhtu khuallian Pu F. Rodingliana chuan tunlai IT thiamna hmang tangkaia billing software thar, a hma mi aia tha zawk leh mipuite/consumer te tan pawha hriatthiam awlsam zawk hman tan a ni ta chu lawmawm a tih thu a sawi a, a vawikhatnan a Mizoram puma billing software thuhmun hman a ni ta chu hmasawnna lawmawm tak a nih thu a sawi. Khuallian chuan P&E hnuaia thawktu kalkhawmte chu mipui tana thawk an nih anga inpekna thuk zawk nena inhawng taka mahni awm hmun theuhah mipuite tana thawk turin a chah a. Central Scheme hrang hrang tam zawk hai lut turin Central Scheme-te zirchianga Mizoram in kan chhawr tangkai theih tur dap a, chumi mil a project proposal tam zawk siam turin Department Engineer kalkhawmte chu a chah bawk a ni. Mizoram hmun hrang hranga kan harsatna lian ber Transformer indaih lohna te phuhruk turin Transformer thar leina tur budget-ah pawisa dah belh a nih thu tarlangin, tunah pawh Transformer thar 60 dang lei belh leh tura buaipui mek a nih thu a sawi a ni. Mizoram hmun hrang hranga kawlphetha pekna transmission line pawimawh zualte double source nei vek turin hmalak chhoh mek zel a nih thu khuallian hian a sawi bawk a ni.

Khualzahawm Pi K. Lalrinzuali, Secretary, P&E pawhin thu sawiin eng hi kan nunphung engkim nena inzawm tlat a nih tawh avangin a tel lovin kan awm thei tawh lo va, chuvangin Power Supply tha mipuite kan pek theihnan tan la lehzual turin Department Officer kalkhawmte a chah a, P&E Department hna chu eng petu mai ni tawh lovin ram humhalhna thil a nih tawh thu sawiin, kan State ramrite luahlum a nih theihnan heng hmun kilkhawr te hi kan tih hmasawn a ngai a, chuvangin rural electrification ngaih pawimawh a tul tih a sawi a ni.

He hunah hian Revenue Drive kharna, revenue hmu tha leh AT&C loss nei tlem Sub-Division-te hnenah lawmman sem a ni a, Electrical accident chungchang inzirtirna video clip tawi/reels insiam siak result puanna leh lawmman hlanna neih a ni.

Khuallianin a tlangzarh tak UGO Electric Billing System Software hi Mizoram pumah tun thla tir August ni 1 atang khan hman tan a ni a, He billing system thar hi Inventive Solution kutchhuak niin March thla khan Pilot Project atan Rural Sub-Division leh Distribution Sub-Division-III-ah te hman chhin a ni a, May 2025 atang khan Mizoram a District Headquarters hrang hrangah hman tan niin August Ni 1, 2025 atang khan Mizoram pumah hman tan a lo ni ta a ni. Tun hi billing software/ system chi khat Mizoram puma hman vawikhatna a ni. He billing system hi cloud base niin mobile android leh IOS application hmangin Mizoram khawi hmun atang pawhin online hmanga bill pek theih a ni ta a ni.

Tun dinhmunah Mizoram pumah Consumer 3,10,130 awmin heng zinga Consumer 2,01,843 ten August 2025 bill an pe tawh a, bill dawn tawh zawng zawng zat hi Rs. 17.73 Crore niin online payment a bill dawn zat hi Rs. 9.92 Crore a nih laiin, Counter a bill dawn zat chu Rs. 7.81 Crore a ni. Online (PEDM apps) hmanga bill pek uar turin Department chuan Consumer/mipuite a ngen nghal a ni.

LAWMMAN DAWNGTUTE :
1. Reels insiam siak-
1) KTP, Andria Group, Sakawrtuichhun.
2) TKP, Chanmari Vengthlang Unit, Lunglei.
3) Zo Animation, Zemabawk Bethel veng.

2. Revenue Collection ti tha-
1) Serchhip Sub-station Sub-Division
Kawnpui Power Sub-Division
Darlawn Sub-Division
Hnahthial Power Sub-Division
Lawngtlai Power Sub-Division

2) Rural Power Sub-Division

3) Serchhip Power Sub-Division

3. AT&C Loss tlem ber – Distribution Sub-Division-III, Aizawl.