Hnahthialah National Deworming Day August Round hawnna hun hman a ni.

#ZONEWS Hnahthial August 12, 2025: Nimin chawhma khan Govt Middle School Hnahthial-ah Chief Medical Officer (CMO) Office bultumin ‘National Deworming Day August Round’ hawnna hun hman a ni a, he hun hi Hnahthial Addl. DC, Pu Zothanmawia Khiangte chuan khuallian niin a hmanpui a ni.

Addl. DC, Pu Zothanmawia Khiangte chuan rulhut hian kan taksa in a mamawh ka ei leh in a vitamins a lo ei then ve thin avangin mihringah harsatna leh hrisel lohna tam tak a thlen thin a, zirlailai thiam theih lohna te pawh a thlen nasa hle a, chuvang chuan rulhut laka kan fihlim theihna tur chuan faina leh thianghlimna kawngah tan kan lak a tul a ni a ti a. Addl DC chuan zirlai naupangte chu zuk leh hmuam, ruih theih thil laka fihlim hram hram turte, social media a tangkai zawnga hmang turte, mobile phone leh computer te pawh hunbi nei chauh a kawih thin turte a chahin a pawimawh ber chu an zirlai a nih thu leh an zirlaiah theih tawp chhuah turin a chah nghal a ni.

He hun hi Dr. R. Lalsanglura, Chief Medical Officer chuan a kaihruai a, rulhutin mihringa harsatna a thlen dan leh rulhut kai lo tura invenna kawng zirlai naupangte hnenah a sawifiah bawk a ni.