HNAWL NIHNA HIAN PATHIAN LAMA LUHNA KAWNGKHAR A HAWNG ZAWK FO ṬHIN.

#ZONEWS #FIANRIAL SEPTEMBER 10, 2025:
HNAWL NIHNA HIAN PATHIAN LAMA LUHNA KAWNGKHAR A HAWNG ZAWK FO ṬHIN.

Vawiin kan fianrial hunah chuan Isua rawngbawlna lo thang zel chungchang; damlo a tihdam te, ramhuai a hnawh chhuah te leh, thunei taka mi a zirtir chungchangte kha ngaihtuah ila. Thilmakte a ti chung khan, ama khua ngei, Nazareth-ah chuan hnawl a tawk tho a ni, hei hian rinna leh inthenawm khawvenna hi a inkalh fo thei a ni tih a tilang a ni.

Tin, amah vekin, “Tih tak meuhvin ka hrilh a che u, zawlnei tumah mahni khaw lama miin an lawm ngai lo. (Luka 4:24).

Nangmah thlawp ber tura ngaihten an hnawl che avanga rilru nat em emna i tawng tawh ngai em?

Isua rawngbawlna pawh nung takin a rawn intan chho a, thilmak tam tak tiin, sang takah a invawrh chho a, chutihrualin duh lohna leh hnawlna a tawk zui a ni tih kan hria. Kana leh Galili hmunahte chuan, a chunglam thuneihna chu, khawngaihna leh thiltihtheihna hmangin a takin a lantir a. Kapernaum khuaa sipai hotu pakhat chuan a bawih naupang tidam turin nasa takin a dil a, nimahsela, a in chu Isua luhna tlaka a ngaih loh avangin, thu hmanga tihdam sak mai turin Isua chu a ngen a ni, Isua chuan thu kam khat lek hmangin mipa naupang chu a tidam ta a nih kha. Isua khan amah ring tak zettu, tute mai pawh kha, hnamdang daih pawh ni sela,  khawngaihnain a lo chhang let duh vek a ni tih a tilang a ni.

Sipai hotu bawih, mipa naupang, Isuan a tihdam khan, rinna chungchangah eng nge min zirtir ve le?

Sipai hotu rinna kha! a bawih mipa naupang tihdam nan khan, Isua thu sawi mai kha a tawk a ni tih a ring tawk em em a ni. Hetiang rinna hi, chona kan hmachhawn hrang hrangah hian keini pawhin kan mamawh a ni, hmuh theih loh leh lang mai thei lo nimahsela, kan tana Pathian thutiam chu kan ring tawk ve tur a ni.

Kan hmuh theihloh thil lo thleng turte hmachhawn zel chungin engtin nge rinna chu kan vawn nun tlat theih ang?

A hnuah Isua khan, ramhuaite chungah pawh thu a nei a ni tih lantirin, Kapernaum Synagogue-ah khan ramhuai a hnawt chhuak a. Thu maiin ramhuai man mi pakhat chu a tizalena, thil thleng a hmuna entute khan mak an ti em em mai a ni. Hei hian thlarau khawvela Isua thuneihna a lantir a, thimnain a tuam leh a mante chhuah zalen tura a tihtur hna pawimawh tak chu a entir nghal bawk a ni.

Ramhuaite chunga Isua thuneihna khan, a tihtur leh a hna chungchang eng nge a lantir le?

Khatianga thil mak ropui tak tak a ti chung khan, Isua chu ama khua ngei, Nazareth-ah khan hnawl a ni tho a ni. Mipa naupang a nih lai hria a, a ṭhang lian lai hmutute khan, thil mak tak tak titu mite ngaihsan leh zui a nihna kha an pawm thei lova, chutah chuan an insiamrem thei lo a ni.  Rinna an tlakchham avang khan malsawmna an dawn tur an dawn loh phah a, an nun thlak thleng hlawk thei thilmakte kha an tawn loh phah a ni.

Hre chiang, hmelhriat intihnaten kan rinna hi kan hliahtir ve fo thin em le?

Nazareth-a Isua an hnawlna hian, kan hmuh dan leh kan hriat dan sa, hleih nei tak piah lamah hian Pathian chawimawina leh hriatchianna chu a awm a ni tih min hrilh nawn a ni. Kan rin loh em em hmun leh mite atang pawhin Pathian hnathawh hi a lo lang thei vek a, chuvangin kan thinlung hi Pathian tan kan hawng reng tur a ni tih chiang takin min hriattir a ni.

NGUN TAKIN INNGAIHTUAH ILA!

Kan hre chiang nia kan hriat avanga kan ngaihnep leh engahmah an thusawi kan ngaih loh te kan tawng fo tawh em? Kan beisei loh leh kan rin loh em em hmun leh mite atanga kan hnena Pathian hnathawh lo kal tur kan hriat loh te, kan hmaihte a awm fo tawh ang em?

Pathian hnathawh kan hmuh theihna turin, thinlung inhawng takin, hmun leh mite pan thin ila. Isua thu sawi ring tawk em emtu sipai hotu rinna kha pawmpui ila, thim chunga Lal Isua thuneihna thute hi i ring tlat ang u.

ṬAWNGṬAINA

Tin, an hnenah, “He Pathian Lehkha Thu hi vawiinah hian in hriatah a lo thleng ta,” tiin a sawi tan a (Luka 4:21).

Lalpa duhtak, ka nun min din chhohna kawngah, ka nun awmze neia siamtu chu hmingthanna ni lovin, ka nunchhan nangma rawngbawlna ngei chu a nih avangin lawmthu ka hrilh a che. Thinlung hliamte tuam dam a, sualna rilru leh thlarau sual neite thlak thleng thei tura I thiltih theihna leh thuneihna min pek avangin ka fak a che. Nangman sawi tura  min tihte chauh sawi a, ka hnena I thlarau min pek ang zia zel a chet leh nun ka duh e. Miten ring lo mahsela, Aw Lalpa, Nangmaha ka nihna leh, Nangmaha thlan leh koh ka nihna chu a danglam ngai dawn si lova. Isua hmingin ka dil e, Amen!