Home Minister Pu K. Sapdanga’n Mizoram Polytechnic Lunglei leh Mizoram Engineering College, Pukpui a tlawh

#ZONEWS Lunglei August 18, 2025: August ni 16, 2025 Inrinni khan Mizoram sawrkara Home, UD&PA leh DP&AR Minister Pu K. Sapdanga chuan Lunglei Theiriata Mizoram Polytechnic Lunglei (MPL) hmunhma leh Pukpuia Mizoram Engineering College (MEC) tur hmun hmate tlawhin, an dinhmun a enfiah.

Minister hi a nupui Pi Darkhumi, Lunglei HPC Vice Chairman Pu V. Malsawmtluanga, Lunglei South bialtu MLA Pu Lalramliana Papuia, Lunglei West bialtu MLA Pu T. Lalhlimpuia, LMC Chairman Pu Lalzuithanga leh councillor-te, UD&PA Secretary Pu Lalmalsawma Pachuau, District Bawrhsap Pi Navneet Mann leh official dangte’n an ṭawiawm a. Mizoram Polytechnic Lunglei a tlawhnaah hian Higher & Technical Education (H&TE) Director Pu Lalṭanpuia hovin MPL Principal Er Lalnuntluanga leh thawktute’n lo dawngsawngin, MPL dinhmun leh mamawhte Minister hnenah hian an lo thlen a ni.

MPL Principal Er Lalnuntluanga chuan ram luah man chungchanga court thubuai vanga June ni 27, 2025-a MPL building eng emaw zat kalh chu sawrkar hma laknain August ni 12, 2025-ah hawn a nih leh tawh thu leh class pawh pangngai taka kalpui a nih tawh thu sawiin, sawrkarin a ngaihsaknaah an lawm tak zet tih a sawi.

Minister Pu K. Sapdanga chuan MPL chu engineering lama mi thiam tak tak leh Mizoram innghahna ṭhahnem tak chher chhuaktu, Mizorama technical institution upa ber leh pûm pawimawh tak a nih angin a hlu hle tih sawiin, tluang taka zirna chhunzawm leh theih a ni chu lawmawm a tih thu a sawi a. Tluang tak leh ṭha taka MPL zirna kalpui a nih theih nan sawrkarin theih tawp a chhuah tih sawiin, harsatna leh mamawh la awm – building thuam ṭhat leh thawktu indaih lohna phuhrukna tur te pawh a ṭul anga ngaihtuah chhoh zel a nih tur thu a sawi a. Thawktute chu ṭhahnem ngai leh phur taka thawk zel tura chahin, MPL chu zirna in ṭha tak ni chhunzawm zel turin duhsakna a hlan.

Lunglei South bialtu MLA Pu Lalramliana Papuia chuan MPL tihchangtlunna tur chu sawrkar hotute’n an vei thu leh theih tawpa hma an lak thu sawiin, Superintendent Quarters leh Girls Hostel sakna tur pawh sawrkarin a ruahman mek thu a sawi a. Zirlaite’n an mamawh a hnena an thlen angin silpaulin pali a hlan bawk.

Minister hian Pukpuia Mizoram Engineering College tura sak chu tlawh bawkin, a dinhmun a enfiah bakah, official-te nen zirna ṭan thei tura hma lakna leh hmabak awmte an sawi ho va. H&TE Director Pu Lalṭanpuia chuan Mizoram Engineering College sak ṭan dan leh tun dinhmun report a pe a. MEC chu Rashtriya Uchchatar Shiksha Abhiyan (RUSA) hnuaia sum hmuh cheng vaibelchhe 26 sengin April 22, 2016-ah sak ṭan a nih thu leh November ni 16, 2018-ah sak zawh a nih thu te, Prime Minister-in February ni 3, 2019-ah ral aṭanga a hawn tawh thu leh harsatna hrang hrang avanga zirna la kalpui ṭan theih a nih loh thu te a tar lang a. Building sak zawh tawh thawm ṭhat ngai leh a panna kawng siam ṭhatna leh mamawh hrang hrang atan Mizoram sawrkarin cheng vaibelchhe 25.41 a dah thu leh hma lak chhoh mek a nih thu a sawi a. Mizoram Chief Minister Pu Lalduhoma’n MEC chu kum 2026-2027 session-a zirna kalpui ṭan hman tura a tih angin department chuan theih tawp chhuahin zirna ṭan hman ngei tumin hma an la, tih a sawi.

Minister Pu K. Sapdanga chuan MEC chu engineering zirna tur leh Mizoram hmasawnna atana zirna in pawimawh tak tur a nih avangin Chief Minister-in a duh ang ngeia kum 2026-2027 session-a ṭan hman a nih theih nan ṭha tak leh chak taka hna thawk turin department hotute leh thawm ṭhat ngai leh buaipui ngai hrang hranga mawhphurtute chu a chah a. Mamawh an neihte pawh sawrkara thlen zung zung turin a chah.

Mizoram Engineering College-ah hian building ding lai 8 – Academic Block, Administrative Block, Workshop/Laboratory, Library, Boys Hostel, Girls Hostel, Cafeteria leh Students Common Room te a awm a. Sawrkarin a thawm ṭhatna tur cheng vaibelchhe 25.41 a ruahman chu kawng (approach road) siamna atan cheng nuai 750 (MPWD kutah), tui pekna leh dah khawlna (water supply & storage) atan cheng nuai 249.44 (PHED), eng pekna leh transformer bunna atan cheng nuai 106.36 (P&ED) leh H&TE kutah campus tihchangtlunna te, hmanrua leh bungraw hrang hrang leina atan cheng nuai 1435.39 dah a ni.